“Somaliland”in tanınması iddiası gündəmi silkələdi
Sionist rejim mediasında yayımlanan məlumatlara görə, rejim hökumətinin “Somaliland”i müstəqil dövlət kimi tanıması ehtimalı təkcə diplomatik addım deyil, həm də Qəzzalıların köçürülməsinə yönəlik daha geniş siyasi planın tərkib hissəsi ola bilər. Bildirilir ki, bu addım ABŞ prezidenti Donald Trump tərəfindən irəli sürülmüş və “Qəzza Rivierası” kimi tanınan plan çərçivəsində təzyiq mexanizmi kimi dəyərləndirilir.
Sionist rejimin aparıcı media orqanları yazır ki, rəsmi Təl-Əviv Qəzza zolağında yaşayan fələstinlilərin üçüncü ölkələrə köçürülməsi ideyasını gündəmdə saxlamaq üçün alternativ variantları masada saxlayır. Bu kontekstdə “Somaliland”in adının hallandırılması diqqət çəkib.
İşğalçı rejim eksperti: “Bu, təzyiq mesajıdır”
ABŞ üzrə israilli ekspert İdo Dəmbin “İsrael News24” kanalına verdiyi müsahibədə bildirib ki, “Somaliland” bir müddət əvvəl Qəzzalıların yerləşdirilə biləcəyi mümkün ərazilərdən biri kimi müzakirə olunub. Onun sözlərinə görə, bu məsələ Trampın altı aydan çox əvvəl gündəmə gətirdiyi “Qəzza Rivierası” planı çərçivəsində ortaya çıxıb.
Dəmbin hazırkı mərhələdə bu ssenarinin reallaşmasını az ehtimallı saysa da, atəşkəsin mövcudluğunu əsas gətirərək prosesin hələlik dondurulduğunu vurğulayıb. Bununla belə, o qeyd edib ki, İsrailin baş naziri Benyamin Netanyahu tərəfindən “Somaliland”in tanınması ilə bağlı mesajlar Təl-Əvivin bu istiqamətdə işlədiyini göstərmək üçün siyasi təzyiq xarakteri daşıya bilər.
“Tanımadığı dövləti tanımaq” paradoksu
Ekspert əlavə edib ki, bu addım bir çox cəhətdən təəccüblüdür. Onun fikrincə, sionist rejimin vaxtilə Kosovo kimi mübahisəli statusa malik qurumları tanıması ilə oxşar paralellər aparmaq mümkündür. Burada da başqa bir dövlətin nəzarəti altında olan və müstəqillik iddiası irəli sürən bir strukturdan söhbət gedir. Dəmbin xüsusilə vurğulayıb ki, Tramp administrasiyasının “Somaliland”i tanımaması bu məsələdə həlledici faktorlardan biridir.
Netanyahu ofisinin açıqlaması və beynəlxalq reaksiya
Netanyahu ofisi dünən yaydığı ilkin bəyanatda baş nazirin “Somaliland Respublikasını” müstəqil və suveren dövlət kimi tanıdığını elan etdiyini bildirib. Açıqlamada Netanyahu, xarici işlər naziri Gideon Sa’ar və “Somaliland” rəhbərliyi arasında qarşılıqlı bəyannamənin imzalandığı qeyd olunub.
Bu addım beynəlxalq aləmdə ciddi etirazlara səbəb olub. Xüsusilə Somali, Türkiyə, Misir, İran və Cibuti rəsmi səviyyədə bu qərarı pisləyiblər. Bir çox müşahidəçi hesab edir ki, məsələ təkcə Afrika Buynuzu regionu ilə məhdudlaşmır, eyni zamanda Qəzza ətrafında gedən geosiyasi planların tərkib hissəsidir.
