Səlfitdə 2224 dönüm torpaq müsadirə edilir
Sionist rejim işğal altındakı İordan çayının qərb sahilinin şimalında yerləşən Səlfit şəhərində 2224 dönüm Fələstin torpağının “hərbi məqsədlər” adı altında müsadirə edilməsinə dair yeni qərar qəbul edib.
Fələstinin Divar və Məskunlaşmaya Qarşı Müqavimət Komissiyasının məlumatına görə, qərar Səlfitə bağlı Mərdə qəsəbəsində yerləşən geniş ərazini əhatə edir.
Bildirilib ki, müsadirə qərarı Mərdənin Vadi Qasım və Kəfif əl-Əbhər bölgələrindəki torpaqlara şamil olunur. Sözügedən ərazilərin rejim ordusunun nəzarətinə verilməsi nəzərdə tutulur.
Qərara əlavə edilən xəritələrə əsasən, müsadirə olunacaq torpaq sahəsi 505 nömrəli yolun dərhal cənubunda, qanunsuz Ariel yaşayış məntəqəsinin şimalına doğru uzanan yerli yolun kəsişməsində yerləşir.
Ərazidə hərbi obyektin yaradılması planlaşdırılır
Fələstin tərəfinin açıqlamasına görə, sionist rejim müsadirə edilən ərazidə müşahidə və rabitə məqsədilə qüllə və ya başqa hərbi təyinatlı obyekt tikməyi planlaşdırır.
Bu qərar sionist rejimin İordan çayının qərb sahilində Fələstin torpaqlarına nəzarəti genişləndirməsi ilə bağlı mübahisələri yenidən gündəmə gətirib.
Sionist rejimin işğal altındakı ərazilərdə həyata keçirdiyi torpaq müsadirələri və yaşayış məntəqələrinin genişləndirilməsi Fələstin yaşayış məntəqələri arasında coğrafi əlaqələrin zəiflədilməsi baxımından da ciddi narahatlıq doğurur.
Şərqi Qüdsdə 650 mənzillik yeni layihə
Eyni zamanda Fələstin rəhbərliyinə bağlı Qüds Valiliyi sionist rejimin işğal altındakı Şərqi Qüdsün cənubunda təxminən 650 mənzildən ibarət yeni yəhudi yaşayış məntəqəsi yaratmağı planlaşdırdığını açıqlayıb.
“Novi Rahel” adlandırılan layihənin 27 dönümlük ərazidə həyata keçirilməsi nəzərdə tutulur.
Qüds Valiliyinin məlumatına görə, sionist rejimin Regional Planlaşdırma və Tikinti Komitəsi layihə ilə bağlı planı ictimai müzakirə mərhələsinə çıxarıb. Yeni tikililərin fələstinlilərə məxsus yaşayış evlərinin yaxınlığında yerləşəcəyi bildirilir.
Fələstin tərəfi layihənin nəticələrindən xəbərdarlıq edir
Qüds Valiliyi layihənin təhlükəsinin yalnız tikilməsi nəzərdə tutulan mənzillərin sayı ilə məhdudlaşmadığını vurğulayıb.
Açıqlamada layihənin yerləşdiyi ərazi baxımından fələstinlilərin gündəlik həyatına birbaşa mənfi təsir göstərə biləcəyi qeyd olunub. Fələstin tərəfi bunu bölgədəki yaşayış məntəqələri arasındakı coğrafi bütövlüyü parçalamağa yönəlmiş daha geniş siyasətin tərkib hissəsi hesab edir.
Həmçinin bildirilir ki, belə layihələr vasitəsilə Fələstin əhalisinin şəhərsalma imkanlarının məhdudlaşdırılması və ərazidə yeni faktiki vəziyyətin yaradılması hədəflənir.
3400-dən çox mənzili əhatə edən layihələr
Sionist rejimin “İr Amim” qeyri-hökumət təşkilatının məlumatına görə, son həftələr ərzində Şərqi Qüdsdə ümumilikdə 3400-dən çox mənzili əhatə edən üç iri yaşayış məntəqəsi layihəsinin təsdiqlənməsi istiqamətində proses irəlilədilib.
Bu layihələr sionist rejimin Şərqi Qüds üzərində nəzarətini daha da gücləndirmək cəhdlərinin tərkib hissəsi kimi qiymətləndirilir.
Birləşmiş Millətlər Təşkilatı və beynəlxalq ictimaiyyətin böyük hissəsi sionist rejimin işğal altındakı Fələstin ərazilərində saldığı yəhudi yaşayış məntəqələrini beynəlxalq hüquqa zidd hesab edir. Bu məskunlaşma siyasətinin iki dövlətli həll perspektivinə ciddi zərbə vurduğu bildirilir.
Sionist rejimin “İndi Sülh” təşkilatının məlumatına əsasən, işğal altındakı İordan çayının qərb sahilində 500 mindən çox, Şərqi Qüdsdəki yaşayış məntəqələrində isə təxminən 250 min işğalçı yəhudi məskunlaşıb.
