Əyn Qana və Kfərtəbnit bombalandı
Məlumata görə sionist rejimin döyüş təyyarələri bu gün – bazar ertəsi Nəbatiyyə vilayətində yerləşən Əyn Qana və Kfərtəbnit qəsəbələrində iki yaşayış binasına hava zərbəsi endirib. Hücum nəticəsində hər iki bina tamamilə dağıdılıb. Hər iki yaşayış məntəqəsi Litani çayının şimalında, Nəbatiyyə şəhəri yaxınlığında yerləşir.
Məlumata görə, hücumdan əvvəl sionist rejim ordusu sözügedən binaları vuracağı ilə bağlı təhdid səsləndirib.
Gün ərzində bir neçə hücum qeydə alınıb
Bundan əvvəl sionist rejimə məxsus pilotsuz uçuş aparatı Sur qəzasının Qəlilə qəsəbəsində bir avtomobili hədəfə alıb. Hücum nəticəsində bir nəfər şəhid olub, 8 nəfər yaralanıb.
Eyni zamanda, Sidon qəzasında, Sərfənd və Ənsariyyə qəsəbələri arasındakı sahil yolunda sionist rejim PUA-sının endirdiyi zərbə nəticəsində də xəsarət alanların olduğu bildirilib.
Sərhəd kəndlərində gərginlik
Müxbirin verdiyi məlumata əsasən, İsrailə məxsus bir pilotsuz aparat Aytə əş-Şaab qəsəbəsinə üç ədəd bomba atıb. Bundan əlavə, gecə saatlarında İsrail xüsusi təyinatlı qüvvələrinin qəsəbəyə sızaraq partlayış törətdiyi bildirilib.
İsrail qüvvələri həmçinin işğal altındakı Fələstinlə sərhəddə yerləşən Ədəysə qəsəbəsinə daxil olaraq partlayış həyata keçirib. Bununla yanaşı, İsrail artilleriyası Ramiya qəsəbəsinin Salixani ərazilərini atəşə tutub.
Atəşkəs və BMT qətnaməsi pozulur
Bu hücumlar sionist rejimin 26 noyabr 2024-cü il tarixli “hərbi əməliyyatların dayandırılması” bəyanatını, eləcə də 11 avqust 2006-cı ildə qəbul edilmiş BMT Təhlükəsizlik Şurasının 1701 saylı qətnaməsini sistemli şəkildə pozması fonunda baş verir.
Livan tərəfi bu hücumları ölkənin suverenliyinə və mülki əhalinin təhlükəsizliyinə qarşı açıq təcavüz kimi qiymətləndirir. Rəsmi dairələr beynəlxalq ictimaiyyəti İsrailin davam edən pozuntularına qarşı real addımlar atmağa çağırır.
