Qəzzaya intensiv hücumlar: İsrail ordusu atəşkəsi yenidən pozdu
İsrail ordusu 10 oktyabrda imzalanmış razılaşmanın şərtlərini yenidən pozaraq Qəzza zolağının müxtəlif bölgələrinə hava və raket hücumları həyata keçirib. Hücumlar nəticəsində aralarında qadın və uşaqların da olduğu 21 fələstinli şəhid olub, çox sayda insan yaralanıb.
Qəzza Şəhərinin qərbində yerləşən Əl-Abbas qovşağında mülki avtomobilə endirilən hava zərbəsi faciəyə çevrilib. Qəzzadakı Mülki Müdafiə İdarəsinin sözçüsü Mahmud Basal bildirib ki, hücumda 5 nəfər həyatını itirib. Hadisə şahidlərinin sözlərinə görə, ölənlərdən 3-ü maşında, 2-si isə yoldan keçən mülki şəxslər olub. Yaralananlar arasında uşaqlar da var.
Evlərə artan hücumlar: ailələr hədəfə alınır
Qəzza Şəhərinin Nəsr məhəlləsində Əl-Xudari ailəsinə məxsus evin vurulması nəticəsində 4 nəfər həyatını itirib. Qəzzanın orta hissəsində yerləşən Nüsəyrat qaçqın düşərgəsində, Əl-Avdə xəstəxanasının yaxınlığındakı evə endirilən zərbədə isə 3 fələstinli öldürülüb, 11 nəfər yaralanıb.
Nüsəyratın “2-ci düşərgə” adlanan məhəlləsində daha bir ev hədəfə alınaraq dağıdılıb və bu hücumda aralarında qadın və uşaqların da olduğu 7 nəfər həlak olub.
İsrail hərbi aviasiyası Deyr əl-Bəlah şəhərində də bir evi vurub. Sağlıq mənbələri hücumda 2 nəfərin öldüyünü və çox sayda yaralının olduğunu açıqlayıb.
Atəşkəs şərtləri yenidən tapdalanır
Günün əvvəlində İsrail ordusunun Bureyc və Cibaliya bölgələrini hədəfə alması zamanı da yaralananların olduğu bildirilib. İsrail mətbuatı hücumların Kiryat Gat bölgəsində yerləşən ABŞ hərbi bazası ilə koordinasiya edildiyini iddia edib.
HƏMAS daha əvvəlki bəyanatlarında İsrail ordusunun atəşkəsi dəfələrlə pozduğunu, razılaşmanın təminatçılarına və ABŞ administrasiyasına müdaxilə çağırışı etdiyini açıqlamışdı.
Humanitar böhran dərinləşir
Atəşkəsə görə İsrail ordusu Qəzzaya gündəlik 600 humanitar yardım yük maşınının girişinə icazə verməli idi. Lakin bu say heç vaxt təmin edilməyib və hücumlar dayanmayıb.
11 oktyabrdan bəri həyata keçirilən zərbələr nəticəsində öldürülən fələstinlilərin sayı 318-ə, yaralananların sayı isə 788-ə çatıb. Bundan başqa, İsrail ordusunun geri çəkildiyi Sarı Xətt zonasını genişləndirməsi də razılaşmanın açıq şəkildə pozulması kimi qiymətləndirilir.
