İsrail hərbi gəmiləri humanitar donanmaya hücum etdi
“Səbat donanması”nın yaydığı məlumata görə, çərşənbə günü səhər tezdən İsrail donanması donanma gəmilərinə qarşı təhlükəli hücum həyata keçirib. Hadisə zamanı “Alma” adlı gəmi İsrail hərbi gəmisi tərəfindən dəqiqələrlə təqib olunub, gəmiyə qarşı aqressiv manevrlər edilib.
Məlumata görə, bu prosesdə gəmidəki rabitə və daxili yayım sistemləri məsafədən sıradan çıxarılıb. Hərbi gəminin təhlükəli şəkildə yaxınlaşması nəticəsində toqquşma riski yaranıb və kapitan qəfil manevrlər etməyə məcbur olub.
“Sirius” gəmisinə də hücum edildi
Hücum yalnız “Alma” ilə məhdudlaşmayıb. Bir qədər sonra “Sirius” adlı gəmi də İsrail hərbi gəmilərinin eyni təxribatçı hərəkətləri ilə üz-üzə qalıb. Təhlükəli manevrlər bir müddət davam etsə də, daha sonra hərbi gəmi ərazidən uzaqlaşıb.
Donanmanın bəyanatında bildirilib ki, bu hərəkətlər sülhsevər beynəlxalq iştirakçıların həyatını ciddi təhlükə altına atıb.
Missiya davam edir
“Səbat donanması” bir daha missiyasının dinc və qeyri-zorakı olduğunu vurğulayıb. Bəyanatda qeyd olunub ki, donanma humanitar yardım daşıyır və 40-dan çox ölkədən gəlmiş iştirakçılardan ibarətdir.
Onlar bildiriblər ki, İsrailin bu cür hücumları beynəlxalq hüquqa ziddir və istənilən müdaxilə “hərbi cinayət” sayılacaq. Donanma, bütün təhdidlərə baxmayaraq, Qəzzaya yardım çatdırmaq və mühasirəni yarmaq məqsədindən dönmədiyini açıqlayıb.
İtaliya hökumətindən xəbərdarlıq
Donanmanın italyan sözçüsü Mariya Elena Delia isə açıqlamasında bildirib ki, İtaliya hökuməti gərgin diplomatik vəziyyət yaranmaması üçün öz hərbi gəmisini geri çəkmək qərarı verib.
Buna baxmayaraq, Delia qeyd edib ki, “Səbat donanması” İsrailin təhdidlərinə və İtaliyanın xəbərdarlıqlarına baxmayaraq, Qəzza sahillərinə doğru irəliləməkdə israrlıdır.
Onun sözlərinə görə, bütün göstəricilər İsrailin yaxın vaxtlarda donanmaya qarşı yeni hücum planlaşdırdığını göstərir.
