Pxenyan BMT-də mövqeyini açıqladı
Şimali Koreyanın BMT-dəki daimi nümayəndəliyi rəsmi açıqlama yayaraq bildirib ki, ölkənin nüvə silahına malik dövlət statusu “geri dönməzdir”. Bəyanatda ABŞ-ın Pxenyanı nüvəsizləşməyə məcbur etmək cəhdləri “köhnəlmiş və mənasız iddialar” kimi qiymətləndirilib.
ABŞ-ın tələblərinə sərt cavab
Pxenyan Vaşinqtonun nüvəsizləşmə istiqamətindəki çağırışlarını “təxribat xarakterli müdaxilə” adlandırıb. Rəsmi açıqlamada vurğulanıb ki, ölkənin nüvə arsenalı ABŞ-ın nüvə təhdidlərinə qarşı müdafiə vasitəsidir və bu silahlar Şimali Koreyanın təhlükəsizliyi üçün “qaçılmaz seçim”dir.
Kim Yo Conqdan xəbərdarlıq
Bundan öncə Şimali Koreya lideri Kim Çen Inın bacısı Kim Yo Conq da sərt bəyanatla çıxış edib. O, ABŞ, Cənubi Koreya və Yaponiyanın birgə hərbi təlimlərinin region üçün təhlükəli nəticələr doğura biləcəyini deyib.
Kim Yo Conq bildirib:
“Yanlış məkanda güc nümayiş etdirmək onlara şübhəsiz ağır nəticələr gətirəcək”.
Bu xəbərdarlıq ABŞ və müttəfiqlərinin yaxın günlərdə Koreya yarımadası və ətrafında keçirməyi planlaşdırdığı “Dəmir dəyənək” nüvə əməliyyatı təlimləri və çoxsahəli “Azadlıq sərhədi” hərbi manevrlərinə aiddir.
Regionda gərginlik artır
Müşahidəçilərin sözlərinə görə, Şimali Koreyanın sərt mövqeyi və ABŞ-ın təzyiqləri Koreya yarımadasında gərginliyi daha da artırır. Pxenyanın nüvə proqramından geri addım atmayacağı açıq şəkildə bəyan olunub.
