Hörmüz boğazı “geniş əməliyyat zonası” elan edildi
İran İnqilab Keşikçiləri Korpusunun Hərbi Dəniz Qüvvələri komandanının siyasi köməkçisi briqada generalı Məhəmməd Əkbərzadə bildirib ki, İran Hörmüz boğazının əhatə dairəsini əhəmiyyətli şəkildə genişləndirib.
Onun sözlərinə görə, əvvəllər yalnız Hörmüz və Həngam adaları ətrafını əhatə edən boğaz artıq Cask və Siri sahillərindən Böyük adalara qədər uzanan strateji əməliyyat zonasına çevrilib.
Əkbərzadə qeyd edib ki, İran bölgədəki bütün hərəkətləri diqqətlə izləyir və ölkənin sularına və maraqlarına qarşı heç bir təhdidə imkan verilməyəcək.
ABŞ freqatına xəbərdarlıq atəşi açıldığı bildirildi
İran rəsmisi açıqlamasında son günlər ABŞ-a məxsus freqatın Hörmüz boğazından keçməyə cəhd etdiyini iddia edib. Onun sözlərinə görə, İran hərbi dəniz qüvvələri tərəfindən xəbərdarlıq atəşləri açılıb və gəmi marşrutunu dəyişmək məcburiyyətində qalıb.
İran ordusu döyüş hazırlığını artırır
Əkbərzadə vurğulayıb ki, İran qüvvələri bölgədə düşmən hesab etdiyi tərəflərin fəaliyyətini daimi nəzarətdə saxlayır və tam döyüş hazırlığı vəziyyətindədir.
Bir neçə gün əvvəl İran ordusunun Hərbi Dəniz Qüvvələrinin komandanı Şəhram İrani də ölkənin sualtı qayıqlarının əməliyyatlara hazır olduğunu açıqlamışdı. O bildirmişdi ki, bu addım Hörmüz boğazında uzunmüddətli hərbi mövcudluğu gücləndirmək məqsədi daşıyır.
Tehran sanksiya ölkələrini xəbərdar edib
İran ordusunun sözçüsü briqada generalı Əkrəmi Niyanın açıqlamasına görə, ABŞ sanksiyalarında iştirak edən ölkələr Hörmüz boğazından keçid zamanı çətinliklərlə üzləşə bilər.
Tehran bildirir ki, Hörmüz boğazının təhlükəsizliyi İran silahlı qüvvələrinin məsuliyyətindədir və bölgədən keçən bütün gəmilər İranın müəyyən etdiyi qaydalara uyğun hərəkət etməlidir.
Rəsmi Tehran bu tədbirlərin ABŞ-ın bölgədə koordinasiyasız şəkildə həyata keçirdiyi addımlara cavab olaraq atıldığını vurğulayır.
