“Hermes 900” endirilib
İran İslam İnqilabı Keşikçiləri Korpusu açıqlayıb ki, sionist rejimə məxsus “Hermes 900” tipli pilotsuz uçuş aparatı müasir hava hücumundan müdafiə sistemi vasitəsilə vurulub.
Qurumun məlumatına görə, pilotsuz aparat hücum missiyasını yerinə yetirməzdən əvvəl endirilib və tam silahlanmış vəziyyətdə ələ keçirilib. Bildirilir ki, aparat hazırda SEPAH-ın aerokosmik qüvvələrinin nəzarətindədir.
Aparat mütəxəssislərə təhvil verilib
SEPAH bəyan edib ki, ələ keçirilən pilotsuz aparat ekspertlər və aerokosmik mühəndislər tərəfindən araşdırılmaq üçün təhvil verilib. Qurum bunun texniki baxımdan əhəmiyyətli məlumatlar əldə etməyə imkan yaradacağını qeyd edib.
Rəsmi açıqlamada vurğulanıb ki, aparatın “tam sağlam və silahlı vəziyyətdə” saxlanıldığı iddia olunur.
“Cavabsız qalmayacaq” mesajı
SEPAH ayrıca bəyanatında ABŞ və İsrailin son dörd gündə mülki şəxslərə qarşı törətdiyi hücumların cavabsız qalmayacağını bildirib. Qurum müharibənin “daha dərin və çoxqatlı səviyyədə” davam etdiriləcəyini vurğulayıb.
Açıqlamada beynəlxalq təşkilatlar və insan haqları qurumları səssiz qalmamağa çağırılıb və mülki obyektlərə hücumların araşdırılması tələb edilib.
Olunan hücumlar və itkilər
SEPAH bəyan edib ki, ABŞ və İsrail qüvvələri məktəblər, xəstəxanalar və yaşayış binaları daxil olmaqla müxtəlif obyektləri hədəf alıb. Qurumun sözlərinə görə, son hadisələr nəticəsində 700-dən çox İran vətəndaşı şəhid olub, çox sayda insan yaralanıb.
İran tərəfi “Sadiq Vəd 4” əməliyyatının davam etdiyini və regiondakı ABŞ bazaları ilə yanaşı işğal ərazisindəki hədəflərin vurulduğunu bildirir.
Regionda qarşıdurma dərinləşir
Son açıqlamalar Qərbi Asiyada hərbi və informasiya müharibəsinin paralel şəkildə davam etdiyini göstərir. Analitiklər hesab edirlər ki, pilotsuz uçuş aparatlarının ələ keçirilməsi kimi iddialar qarşıdurmanın texnoloji aspektini də ön plana çıxarır.
