SEPAH donanması: “Fars körfəzindən kənara çatan raketi ilk dəfə sınaqdan keçirdik”
İran İslam İnqilabı Keşikçiləri Korpusunun (SEPAH) dəniz qüvvələri komandanı, briqada generalı Əli Rza Tengsiri, son günlər keçirilən genişmiqyaslı “İqtidar” dəniz təlimlərinin bütün hədəflərinə tam nail olunduğunu bildirib. O vurğulayıb ki, təlimlər zamanı SEPAH-ın dəniz qüvvələrinin yeni nəsil yerli istehsal raketləri və digər döyüş qabiliyyətləri ilk dəfə nümayiş etdirilib.
Tengsiri açıqlayıb ki, təlimdə ilk dəfə Fars körfəzinin coğrafi ölçüsündən daha geniş məsafəyə çatan raket uğurla sınaqdan keçirilib. Bununla yanaşı, yüksək dəqiqliklə seçilən ballistik raketlər də müxtəlif hədəflərə qarşı tətbiq olunub.
Hədəflər sualtı, suüstü və hava məkanında eyni anda vuruldu
Komandan qeyd edib ki, təlimlər zamanı su altında, suyun səthində və hava məkanında yerləşən bir neçə hədəf eyni vaxtda vurulub. Bu, SEPAH dəniz qüvvələrinin çoxşaxəli döyüş qabiliyyətinin artdığını göstərir.
Tengsiri bildirib:
“Bu təlimdə istifadə edilən bütün silahlar ölkənin müdafiə sənayesinin məhsuludur və bu imkanlar sayəsində biz Fars körfəzində düşmən hərəkətlərini davamlı olaraq izləyir, qiymətləndiririk və istənilən qarşıdurmaya tam hazırıq.”
İran rəsmiləri: Müdafiə gücümüz bu gün əvvəlkindən daha yüksəkdir
Bundan əvvəl İran Məclisinin sədri Məhəmməd Baqir Qalibaf da ölkənin müdafiə durumuna toxunaraq demişdi ki, İranın hərbi imkanları əvvəlki illərlə müqayisədə daha güclüdür və ölkə hər hansı təcavüzə “daha sərt və dəqiq cavab” vermək iqtidarındadır.
