Tarixi sammit: Qəzza üçün sülh sənədi imzalandı
Bu gün axşam Misirin Şarm əl-Şeyx şəhərində keçirilən “Sülh Sammiti” çərçivəsində ABŞ, Misir, Qətər və Türkiyə liderləri Qəzza zolağında atəşkəsin təmin edilməsinə dair razılaşma sənədinə imza atıblar. Sammit Yaxın Şərqdə uzun illər davam edən gərginliyin azaldılması istiqamətində mühüm addım kimi dəyərləndirilir.
Tramp: “Bu sənəd Yaxın Şərqdə yeni dövrün başlanğıcıdır”
ABŞ prezidenti Donald Tramp sammit zamanı çıxış edərək Qəzza razılaşmasının “əhatəli sənəd” olduğunu bildirib. Onun sözlərinə görə, “bu sənəd bölgədə yeni qaydalar və prinsiplər formalaşdıracaq”. Tramp həmçinin İsrail əsirlərinin cəsədlərinin qaytarılması məsələsinin hələ də açıq qaldığını vurğulayıb və bu istiqamətdə axtarışların davam etdiyini qeyd edib.
Tramp əlavə edib: “Heç kim belə bir razılaşmanın mümkün olacağına inanmırdı, amma nəhayət biz Yaxın Şərqdə sülhə nail olduq. Qəzzanın yenidən qurulması isə bu prosesin ən asan hissəsi olacaq”.
O, atəşkəsin regionda sabitliyin bərpası üçün başlanğıc nöqtəsi olacağını söyləyib: “Biz Qəzzada müharibəni dayandırdıq, bu isə güclü bir Yaxın Şərqin başlanğıcıdır. Ümid edirəm ki, daha çox ölkə də Əbraham razılaşmalarına qoşulacaq”. Tramp çıxışını belə yekunlaşdırıb: “Bu, dünya tarixində mühüm bir an olacaq və biz Yaxın Şərqin təhlükəsiz bir yerə çevrilməsini təmin edəcəyik.”
Sisi: “İki dövlətli həll yeganə yoldur”
Misir prezidenti Əbdülfəttah əs-Sisi sammitdə çıxışı zamanı Qəzza razılaşmasını “regionda yeni sülh dövrünün başlanğıcı” adlandırıb. O bildirib ki, iki dövlətli həll Yaxın Şərqdə dayanıqlı sülhün yeganə yoludur.
Sisi vurğulayıb ki, Misir ABŞ-la və digər tərəfdaşlarla birgə Qəzza zolağının yenidən qurulması üçün əsasların hazırlanması istiqamətində çalışacaq.
Pakistan: “Sülh Trampın səyləri sayəsində mümkün oldu”
Pakistanın baş naziri Şahbaz Şərif isə çıxışında ABŞ prezidenti Donald Trampın sülh prosesindəki rolunu xüsusi qeyd edib. O bildirib: “Sülh, prezident Trampın yorulmaz səyləri nəticəsində mümkün oldu”. Şərif əlavə edib ki, Pakistan ABŞ prezidentini Nobel Sülh Mükafatına namizəd göstərib.
Yaxın Şərqdə yeni mərhələ
Ekspertlərin fikrincə, Şarm əl-Şeyxdə imzalanan bu sənəd regionda illərlə davam edən qarşıdurmalara son qoymaq üçün mühüm addımdır. Razılaşma Qəzzada sabitliyin bərqərar olması, humanitar yardımın artırılması və gələcəkdə siyasi dialoqun bərpası üçün əsas baza yaradır.
