“Sədaqət Günü”ndə birlik və ehtiram
Yəmənin paytaxtı Sənə bu gün ümummilli matəmə bürünüb. “Sədaqət sahiblərinə sədaqət günü” adlandırılan mərasimdə ölkənin Baş Qərargah rəisi, şəhid general-leytenant Məhəmməd Əbdülkərim əl-Ğumari yüz minlərlə insanın iştirakı ilə izdihamla dəfn edilib.
Vida mərasimi Mərdan əs-Səbain meydanında və Əş-Şəəb məscidində keçirilib. Paytaxtın müxtəlif rayonlarından və digər vilayətlərdən gələn yüz minlərlə insan şəhidin portretlərini, Yəmən və Fələstin bayraqlarını, eləcə də müqavimət və Quran hərəkatının rəmzlərini qaldıraraq bir araya gəlib. Bu mənzərə xalqın ABŞ–İsrail təcavüzünə qarşı birliyini və mübarizə iradəsini bir daha nümayiş etdirib.
Müfti Şəmsəddin Şərəfəd-din: “Xainləri himayə edənlər Allahın lənətinə layiqdir”
Cənazə namazına Yəmən müftisi Şəmsəddin Şərəfəd-din imamlıq edib. O, çıxışında İsrail və ABŞ-la əməkdaşlıq edənlərin islamdan dönmüş sayılacağını vurğulayaraq, bu cür şəxslərin ifşa olunmasının dini borc olduğunu bildirib.
Müfti deyib: “Kim fitnə törədər və ya fitnə törədəni himayə edərsə, Allahın, mələklərin və bütün insanların lənəti onun üzərinə olsun.” O, xəyanət edənlərin cəzalandırılmasının vacibliyini qeyd edib və şəhidlərin qanının azadlıq və izzət yolunda bütün azad insanlara nur saçdığını söyləyib.
Şərəfəd-din əlavə edib ki, general əl-Ğumari və silahdaşlarının şəhadəti imanlıların sınağıdır. Qurandan “Sizi bir qədər qorxu və aclıqla sınayacağıq…” ayəsini xatırladaraq, Yəmən xalqının Fələstin və Qəzzanın müdafiəsində əzmini dəyişməz saxladığını vurğulayıb.
Müfti çıxışını şəhidlərə dua ilə tamamlayaraq, onların qanının azadlıq yolunun yanacağı və bütün mücahidlər üçün ilham mənbəyi olacağını bildirib.
Hökumət rəsmiləri: “Əl-Ğumari ordunu zirvəyə qaldırdı”
Sənə hökumətinin icraedici rəhbəri Məhəmməd Müftah çıxışında bildirib ki, “bu gün biz ümmətin böyük şəxsiyyətlərindən birinə, fədakar və igid sərkərdəsinə vida edirik”.
Onun sözlərinə görə, general əl-Ğumari silahdaşları ilə birlikdə Yəmən ordusunu xalqın arzuladığı səviyyəyə çatdırıb. Müftah əlavə edib: “Bütün düşmənlər bu qəhrəmanı hədəfə almaqda birləşdilər, lakin onun idealları ölməz qaldı.”
Vida mərasimi Əş-Şəəb məscidində cənazə namazı ilə başlayıb, daha sonra mərhumun cənazəsi Mərdan əs-Səbain meydanına gətirilib. O, şəhid prezident Saleh əs-Səmadın məzarının yanında dəfn olunub. Bu, şəhid liderlərin birliyini və eyni amal uğrunda mübarizəsini simvolizə edir.
“Qüds yolunda şəhadət”
Yəmən Silahlı Qüvvələri ötən cümə axşamı general əl-Ğumarinin şəhadətini elan edib. Açıqlamada qeyd olunub ki, “general Məhəmməd Əbdülkərim əl-Ğumari Qüds yolunda şəhidlik zirvəsinə ucaldı və düşmən İsrail cinayətinin bədəlini ödəyəcək.”
Məlumatda bildirilib ki, şəhid əl-Ğumari öz cihad vəzifəsini yerinə yetirərkən, iman və vətən borcunu icra etdiyi anda həlak olub. Şəhidlər arasında onun 13 yaşlı oğlu Hüseyn və bir neçə müşayiətçisi də yer alıb.
