Ukraynada enerji sistemi çökmə həddində
Ukrayna Enerji Mərkəzi bu gün bəyan edib ki, Rusiya ordusunun son günlərdə həyata keçirdiyi intensiv hava hücumları nəticəsində ölkədəki bütün dövlət istilik elektrik stansiyaları fəaliyyətini tamamilə dayandırıb.
Qurumun “Facebook” səhifəsində yayılan açıqlamada qeyd olunur:
“Bütün dövlət istilik elektrik stansiyalarını bağlamalı olduq. Hazırda enerji istehsalı sıfır səviyyəsindədir.”
Mərkəzin məlumatına görə, bu hücumlar nəticəsində ölkənin enerji sistemində misli görünməmiş itkilər yaranıb və enerji bərpası üçün fövqəladə işlər aparılır.
“Müharibə başlayandan bəri ən güclü zərbə”
Ukrayna Enerji Mərkəzi hücumu “müharibə başlayandan bəri istilik enerjisi infrastrukturlarına endirilmiş ən böyük zərbə” kimi qiymətləndirib. Məlumata görə, Rusiya ordusu bu dəfə rekord sayda raket və pilotsuz uçuş aparatı (PUA) istifadə edib.
Enerji mütəxəssisləri bildirirlər ki, istilik elektrik stansiyalarının sıradan çıxması payız-qış mövsümündə Ukrayna əhalisi üçün ciddi enerji böhranı yarada bilər. Əksər bölgələrdə artıq elektrik enerjisinin məhdudlaşdırılması və fasiləli təminatı tətbiq olunur.
Moskva: “Zərbələr cavab hücumudur”
Rusiya Müdafiə Nazirliyi bəyan edib ki, cümə gecəsi həyata keçirilən bu hücumlar “Ukrayna ordusunun Rusiya ərazisindəki mülki obyektlərə qarşı törətdiyi terror hücumlarına cavab olaraq” həyata keçirilib.
Nazirlik əməliyyatı “cəzalandırıcı və cavab xarakterli” adlandırıb və Ukraynanın “enerji, hərbi sənaye və idarəetmə infrastrukturlarının” hədəfə alındığını bildirib.
Enerji böhranı dərinləşir
Ukrayna hökuməti hazırda elektrik enerjisinin bərpası üçün alternativ mənbələr axtarır. Lakin mütəxəssislər xəbərdarlıq edirlər ki, istilik stansiyalarının tam bərpası aylarla vaxt apara bilər.
Bəzi vilayətlərdə xəstəxanalar və ictimai xidmət obyektləri yalnız generatorlar hesabına işləyir.
Hazırda Ukraynanın enerji şəbəkəsi ciddi təzyiq altındadır və əgər zərbələr davam edərsə, ölkə tam enerji iflası ilə üz-üzə qala bilər.
