Ukrayna rəsmiləri Rus ordusunun ölkənin bir çox bölgəsini hədəf alan genişmiqyaslı hava hücumu həyata keçirdiyini açıqlayıb. Hücumlarda 21 raket və 375 pilotsuz uçuş aparatı (PUA) istifadə olunub, nəticədə insan tələfatı qeydə alınıb və enerji infrastrukturuna ciddi ziyan dəyib.
Ukrayna Ordusunun Hərbi Hava Qüvvələri Komandanlığı Rus ordusunun gecə saatlarında Ukraynanın müxtəlif bölgələrinə qarşı genişmiqyaslı hava hücumu təşkil etdiyini bildirib. Açıqlamada, hücumlar zamanı qanadlı, hipersəs və ballistik tipli ümumilikdə 21 raketin, eləcə də 375 PUA-nın istifadə edildiyi qeyd olunub.
Hava hücumundan müdafiə sistemlərinin işə düşdüyü vurğulanan açıqlamada, 15 raketin və 357 PUA-nın zərərsizləşdirildiyi bildirilib.
Ukrayna Prezidenti Volodimir Zelenskiy sosial şəbəkə hesabında verdiyi açıqlamada hücumların xüsusilə mülki infrastrukturu hədəf aldığını bildirib. Zelenskiy paytaxt Kiyev və ətraf ərazilərlə yanaşı, Xarkiv, Sumi və Çerniqov bölgələrinin də hücumlardan zərər gördüyünü qeyd edib.
Zelenskiy açıqlamasında bildirib: “Xarkivdə bir doğum xəstəxanası, məcburi köçkünlərin yerləşdirildiyi yataqxana, bir tibb fakültəsi və yaşayış binaları zədələnib. Paytaxt və ətrafında isə Rusiya ordusunun əsas hədəfi enerji sektoru olub.”
Kiyev meri Vitaliy Kliçko hücumlar nəticəsində paytaxtda 1 nəfərin həlak olduğunu, 4 nəfərin isə yaralandığını açıqlayıb. Kliçko şəhər üzrə su və elektrik kəsintilərinin yaşandığını bildirərək, “Kritik infrastruktura dəyən zərər səbəbindən təxminən 6 min bina yenidən istiliksiz qalıb,” deyə məlumat verib.
Ukraynanın Baş nazirinin müavini və Yenidənqurma naziri Oleksiy Kuleba hücumlar nəticəsində Kiyevdə 800 mindən çox abonentin elektriksiz qaldığını bildirib. Kuleba həmçinin Çerniqov bölgəsində də 400 mindən artıq abonentin elektrik kəsintilərindən təsirləndiyini qeyd edib.
Xarkiv Vilayət Hərbi Administrasiyasının rəhbəri Oleq Sinequbov şəhərə edilən hücumlar nəticəsində 19 nəfərin yaralandığını açıqlayıb. Yaralıların xəstəxanalarda müalicə altına alındığı bildirilib.
Ukraynanın elektrik ötürmə sistemi operatoru “Ukrenerqo” hücumlar səbəbilə enerji infrastrukturunda zədələnmələr baş verdiyini və bəzi bölgələrdə təcili elektrik kəsintilərinin tətbiq olunduğunu açıqlayıb. Rəsmilər təmir-bərpa işlərinin davam etdiyini və enerji təchizatının mərhələli şəkildə bərpa edilməsinin hədəfləndiyini bildiriblər.
