Berizovoye qəsəbəsi Rusiyanın nəzarətində
Rusiya Müdafiə Nazirliyi şənbə günü yaydığı bəyanatda bildirib ki, “Şərq” qruplaşmasının bölmələri Dnepropetrovsk vilayətində yerləşən Berizovoye qəsəbəsinə tam nəzarəti ələ keçirib. Nazirliyin məlumatına görə, əməliyyat nəticəsində Ukrayna ordusu 270-dən çox hərbçi, bir sıra zirehli texnika, 14 nəqliyyat vasitəsi və bir elektron müharibə stansiyasını itirib.
Ukrayna hərbi sənaye obyektlərinə zərbələr
Məlumata görə, ötən gecə Rusiya Silahlı Qüvvələri uzaqmənzilli yüksək dəqiqlikli hava və quru vasitələri, həmçinin pilotsuz uçuş aparatları ilə Ukrayna hərbi-sənaye kompleksinə genişmiqyaslı zərbələr endirib. Hücumların hədəfi “Sapsan” taktiki raketlərinin hazırlanması, pilotsuz uçuş aparatlarının istehsalı və digər hərbi texnikaların istehsalı ilə məşğul müəssisələr olub. Nazirlik açıqlamasında “məqsədlərə tam nail olunduğunu” vurğulayıb.
Donetsk və Dnepropetrovskda irəliləyiş
Bəyanatda bildirilib ki, “Mərkəz” qruplaşmasının bölmələri Donetsk Xalq Respublikasında və Dnepropetrovsk vilayətində Ukrayna müdafiə xətlərini yararaq irəliləməyə davam edib. Bu əməliyyat nəticəsində 480-dən çox Ukrayna hərbçisinin zərərsizləşdirildiyi, tank, döyüş maşınları və bir neçə artilleriya qurğusunun məhv edildiyi qeyd olunub.
Sumı və Xarkov istiqamətində döyüşlər
Eyni zamanda “Şimal” qruplaşmasının bölmələri Sumı və Xarkov vilayətlərində mövqelərini genişləndirib. Bu bölgələrdə Ukrayna ordusu 215-ə yaxın hərbçisini itirib, tank və döyüş maşınları da sıradan çıxarılıb.
151 hədəf vuruldu, yüzlərlə PUA məhv edildi
Rusiya Müdafiə Nazirliyi həmçinin bildirib ki, əməliyyat-taktiki aviasiya, raket və artilleriya bölmələri Ukraynanın nəqliyyat infrastrukturunu, pilotsuz uçuş aparatlarının buraxılış və saxlama mərkəzlərini, habelə hərbi birləşmələrin və xarici muzdluların müvəqqəti mövqelərini 151 nöqtədə hədəfə alıb.
Nazirliyin açıqlamasına görə, Rusiya hava hücumundan müdafiə sistemləri son əməliyyatlarda 383 Ukrayna PUA-sını məhv edib.
