Qəzzada atəşkəs sistemli şəkildə pozulur
Qəzza zolağında fəaliyyət göstərən hökumətin media ofisi sionist rejimin atəşkəs razılaşmasına ciddi və ardıcıl şəkildə əməl etmədiyini bəyan edib. Bildirilib ki, 10 oktyabr tarixində atəşkəsin qüvvəyə minməsindən sonra ötən 73 gün ərzində sionist rejim tərəfi razılaşmanı açıq şəkildə pozaraq beynəlxalq humanitar hüquqa və sazişə əlavə edilmiş humanitar protokola zidd addımlar atıb.
Rəsmi açıqlamada qeyd olunub ki, bu müddət ərzində müxtəlif dövlət qurumları tərəfindən ümumilikdə 875 atəşkəs pozuntusu qeydə alınıb. Media ofisi bu pozuntuların sistemli xarakter daşıdığını və mülki əhaliyə birbaşa təhlükə yaratdığını vurğulayıb.
875 pozuntu, 411 şəhid
Məlumata görə, qeydə alınan pozuntular arasında 265 mülki şəxsə qarşı birbaşa atəş açılması faktı yer alıb. Bundan əlavə, sionist rejim hərbi texnikasının yaşayış məntəqələrinə 49 dəfə daxil olduğu, fələstinlilərin evlərinin və mülki obyektlərin isə 421 dəfə bombalandığı və ya hədəfə alındığı bildirilib. Eyni zamanda, 150 mülki bina və obyektin partladılaraq dağıdıldığı qeyd olunub.
Bu hücumlar nəticəsində 411 fələstinli həyatını itirib, 1112 nəfər yaralanıb. Açıqlamada həmçinin 45 nəfərin qanunsuz şəkildə saxlanıldığı vurğulanıb. Media ofisi bu rəqəmlərin atəşkəs dövrü üçün misli görünməmiş olduğunu bildirib.
Sistemli humanitar boğma və aclıq
Humanitar vəziyyətlə bağlı hissədə İsrailin yardım öhdəliklərini yerinə yetirmədiyi xüsusi qeyd olunub. Belə ki, razılaşmaya əsasən Qəzzaya 43 800 yardım yük maşını daxil olmalı olduğu halda, faktiki olaraq cəmi 17 819 maşının buraxıldığı açıqlanıb. Bu isə öhdəliyin yalnız 41 faizinin icra edilməsi deməkdir.
Yanacaq məsələsində vəziyyətin daha ağır olduğu bildirilib. Razılaşdırılmış 3 650 yanacaq maşınından cəmi 394-ü Qəzzaya daxil olub ki, bu da 10 faizdən azdır. Nəticədə xəstəxanalar, çörək sexləri, su və kanalizasiya sistemləri demək olar ki, iflic vəziyyətinə düşüb.
Soyuqdan ölən uşaqlar və dağılmış sığınacaqlar
Açıqlamada sığınacaq böhranının da kəskinləşdiyi bildirilib. Çadırların və mobil evlərin Qəzzaya buraxılmaması fonunda son hava şəraitində əvvəllər zərər görmüş 46 evin uçduğu, bu evlərdə sığınan 15 nəfərin həlak olduğu qeyd olunub.
Eyni zamanda, məcburi köçkün düşərgələrində iki uşağın şiddətli soyuqdan həyatını itirdiyi açıqlanıb. Bildirilib ki, 125 mindən çox çadır istifadəyə yararsız hala düşüb və bu da 1,5 milyondan artıq köçkünü real müdafiəsiz vəziyyətdə qoyur. Xüsusilə sərt soyuqları ilə tanınan “qırx gün” dövrünün yaxınlaşması vəziyyəti daha da ağırlaşdırır.
Media ofisi vurğulayıb ki, atəşkəsin bu şəkildə pozulması əhalini aclıq, təzyiq və məcburetmə ilə üz-üzə qoymaq cəhdidir və Qəzzada davam edən humanitar fəlakətə görə bütün məsuliyyət İsrailin üzərinə düşür.
