Qrossi: “İranla nüvə diplomatiyası mürəkkəb mərhələdədir”
Beynəlxalq Atom Enerjisi Agentliyinin (AİEA) baş direktoru Rafael Qrossi İranın nüvə proqramı ilə bağlı diplomatik cəhdlərin “çətin mərhələyə” daxil olduğunu bildirib.
“Mürəkkəb vəziyyət yaranıb”
Fransa mediasının məlumatına görə, Qrossi bu gün verdiyi açıqlamada vəziyyətin olduqca mürəkkəb olduğunu qeyd edib:
“Aydındır ki, bu, tamamilə çətin bir mərhələdir və hazırda olduqca qarışıq vəziyyətlə üz-üzəyik.”
Onun sözlərinə görə, bu gün Nyu-Yorkda İranın nüvə proqramı ilə bağlı maraqlı tərəflər arasında görüş keçirilməsi planlaşdırılır.
İran nümayəndə heyəti Nyu-Yorkda
İranın xarici işlər naziri Səid Abbas Əraqçi də BMT Baş Assambleyasının 80-ci sessiyasında iştirak etmək üçün Nyu-Yorka gedib. O, hava limanında jurnalistlərə açıqlamasında Qrossi ilə görüşəcəyini təsdiqləyib.
Əraqçi bildirib ki, görüşdə İranla AİEA arasında əməkdaşlıq, nüvə proqramının son vəziyyəti və “snapback” mexanizmi müzakirə olunacaq:
“Əgər snapback mexanizmi tam şəkildə işə düşərsə, AİEA ilə əldə olunan razılaşmanın da heç bir etibarı qalmayacaq.”
Gərginlik davam edir
Qrossinin sözləri beynəlxalq ictimaiyyətin İranın nüvə proqramı ətrafında artan gərginlikdən narahat olduğunu göstərir. Ekspertlərə görə, tərəflər arasında diplomatik boşluğun dərinləşməsi yeni böhran riskini artırır.
