“Qaraheybət” faciəsindən dörd il ötür
Bu gün Dövlət Sərhəd Xidmətinə (DSX) məxsus hərbi helikopterin Xızı rayonunda yerləşən “Qaraheybət” aviasiya poliqonunda qəzaya uğramasının 4-cü ildönümüdür. Hadisə 2021-ci il noyabrın 30-da, saat 10:40 radələrində təlim uçuşları zamanı baş vermişdi. Qəza Azərbaycan hərbi aviasiyası tarixinin ən ağır itkilərindən biri kimi yadda qalıb.
Qəza 14 zabitin həyatına son qoydu
Faciə nəticəsində yüksək rütbəli zabitlər də daxil olmaqla 14 hərbi qulluqçu həlak olub, 2 nəfər isə ağır yaralanıb. Həlak olanların adları:
-
Polkovnik Cavadov Fizuli Əli İbram oğlu
-
Polkovnik Nəzirov Emil Nəzir oğlu
-
Mayor Həsənov Elmir Mircəlil oğlu
-
Mayor Əhmədov Elbrus Səmrəddin oğlu
-
Mayor Mayılov Emil Şahid oğlu
-
Mayor Məmmədov Murad Yaşar oğlu
-
Mayor Əliyev Emil Elman oğlu
-
Tibb xidməti kapitanı Əhmədxanov Ceyhun Xanlar oğlu
-
Kapitan Bayramlı Cavid Əhliman oğlu
-
Kapitan Əliyev Xəyyam Əlixan oğlu
-
Kapitan Qaraisayev Teymur Ənvər oğlu
-
Leytenant Süleymanov Abdulla Telman oğlu
-
Baş leytenant Nağıyev Fərid Təyyar oğlu
-
İşçi Nəbiyev Elçin Fikrət oğlu
Yaralananlar
Qəza zamanı polkovnik-leytenant Emil Məmməd oğlu Cəfərov və kapitan Ramin Ramiz oğlu Ədilov ağır yaralanmış, xəstəxanaya yerləşdirilmişdilər.
Elçin Nəbiyevin xatirəsi
Siyahıda “işçi” kimi göstərilən Elçin Nəbiyev Azərbaycanın hərb tarixində xüsusi yeri olan şəxsiyyətlərdən biridir. O, Birinci Qarabağ müharibəsinin əfsanəvi helikopter pilotu, istefada olan polkovnik idi. Təqaüdə çıxdıqdan sonra DSX-də mülki əməkdaş kimi fəaliyyətini davam etdirirdi. Onun faciədə həlak olması xüsusilə böyük üzüntü yaratmışdı.
Dörd il sonra – faciənin izi silinmir
“Qaraheybət” hadisəsi hələ də ölkənin hərbi camiəsində ən ağrılı səhifələrdən biri kimi xatırlanır. Bu gün həlak olan zabitlərin xatirəsi ehtiramla yad edilir, onların peşəkarlığı, fədakarlığı və xidmət yolu bir daha hörmətlə anılır.
