Beynəlxalq xəbərdarlıqlar artır
Qəzzaya dəniz blokadasını yarmaq üçün yola çıxan beynəlxalq “Əzm Donanması” ciddi təhlükə ilə üz-üzədir. Donanma rəhbərliyi bu gün səhər açıqlayıb ki, bir sıra ölkələrin hökumətləri vətəndaşlarını İsrailin “yaxın zamanda hücumu” barədə xəbərdar ediblər.
Məlumata görə, donanma hazırda Yunanıstanın ərazi sularına doğru istiqamətlənir. Bu addımın məqsədi İsrailin hücum ehtimalını minimuma endirməkdir.
İtaliya hərbi müşayiət göndərir
İtaliyanın müdafiə naziri Guido Crosetto açıqlama verərək bildirib ki, ölkəsi Qəzzaya yollanan donanmanı müşayiət etmək üçün ikinci hərbi freqatı göndərəcək. O, həmçinin donanmaya qarşı gecə saatlarında həyata keçirilən hücumu kəskin şəkildə pisləyib və İtaliya Hərbi Dəniz Qüvvələrinə dəstək göstərişi verdiyini açıqlayıb.
İtaliyanın Baş naziri Jorja Meloni isə bəyan edib ki, humanitar yardımların birbaşa Qəzzaya çatdırılmasını asanlaşdırmaq üçün Roma, yardımın Latın Patriarxlığına təhvil verilməsi variantını təklif edib.
“Ömər Muxtar” üzərində dron uçuşları
Donanmadan ayrı qalan “Ömər Muxtar” gəmisinin heyəti dünən axşam bildirib ki, üç pilotsuz uçuş aparatı gəminin üzərində uçuşlar həyata keçirib. Bu uçuşların “kəşfiyyat əməliyyatı” xarakteri daşıdığı qeyd edilib.
Gəmi hazırda təkbaşına donanmaya qoşulmağa çalışır. Onun göyərtəsində mobil tibbi klinika yerləşdirilib və bütün risklərə baxmayaraq yoluna davam edir.
12 hücum qeydə alınıb
“Əzm Donanması” rəhbərliyi son günlərdə donanmanın 12 dəfə pilotsuz uçuş aparatları ilə hücuma məruz qaldığını açıqlayıb. Bu hücumlar nəticəsində donanmadakı 9 qayığın zərər gördüyü bildirilib.
Bu hadisələr beynəlxalq ictimaiyyətdə ciddi narahatlıq doğurub. İtaliya müdafiə naziri Crosetto hadisəni “qəbuledilməz” adlandıraraq, bölgədə humanitar missiyalara maneə törədilməsinin beynəlxalq hüququn pozulması olduğunu vurğulayıb.
