Qəzzada aclıq can almağa davam edir
İsrailin hücumları və sərt blokadası nəticəsində Qəzza zolağında dərinləşən aclıq böhranı hər gün yeni faciələrə səbəb olur. Fələstin Səhiyyə Nazirliyinin məlumatına görə, son 24 saat ərzində 5 nəfər aclıq və qida çatışmazlığı səbəbindən dünyasını dəyişib.
Son itkilərlə birlikdə, 7 oktyabr 2023-dən bəri aclıqdan ölənlərin ümumi sayı 404-ə çatıb. Onların 141-i uşaqdır.
BMT-nin xəbərdarlığı
Birləşmiş Millətlər Təşkilatının dəstəklədiyi Enteqre Qida Təhlükəsizliyi Faza Təsnifatı (IPC) avqustun 22-də Qəzzada “rəsmi aclıq vəziyyəti” elan edib. Bu tarixdən bəri aclıq və yetersiz qidalanma səbəbindən daha 126 nəfərin, onlardan 26-sının uşaq olduğu bildirilib. IPC xəbərdarlıq edib ki, vəziyyət sentyabrın sonuna qədər Deyr əl-Bələh və Xan Yunis bölgələrinə də yayıla bilər.
“Aclıq silah kimi istifadə olunur”
Qəzzada vəziyyət hər gün ağırlaşır. Əsas ərzaq, içməli su, dərman, tibbi ləvazimat və gigiyena vasitələrinin çatışmazlığı dərinləşərək bölgəni humanitar fəlakətə sürükləyib. Yerli və beynəlxalq təşkilatlar İsrailin “aclıq və susuzluğu müharibə silahı kimi istifadə etdiyini” bildirirlər.
İsrail ordusunun hava zərbələri nəticəsində Qəzzanın 88 faizi dağıdılıb. Həmçinin, məcburi köçürmə əmrləri ilə milyonlarla insan evindən didərgin salınıb. Təxminən 2,3 milyon əhalisi olan bölgədə 2 milyona yaxın insan dəfələrlə yerindən edilib.
İnsanlar çadırlarda, xəstəliklər yayılır
Ev-eşiksiz qalan minlərlə insan müvəqqəti çadırlarda və ya izdihamlı məktəblərdə yaşamağa məcbur olub. Gigiyenik şəraitin olmaması, tualetlərin yetersizliyi və təmiz su qıtlığı bulaşıcı xəstəliklərin yayılmasına yol açır.
Buna baxmayaraq, İsrail ordusu gündəlik hücumlarını davam etdirərək qaçqınların yerləşdiyi çadır düşərgələrini və mülki əraziləri hədəfə alır.
