Pizza Hut İngiltərədə 68 restoranını bağlayacaq
İsrailin Qəzzada həyata keçirdiyi hücumlara dəstək verən şirkətlərə qarşı beynəlxalq boykotların iqtisadi təsirləri özünü göstərməyə başlayıb. İngiltərədə Pizza Hut restoranlarını idarə edən şirkətin maliyyə böhranına düşməsi nəticəsində 68 filialın bağlanacağı açıqlanıb.
Məlumata görə, markanın İngiltərə bölməsi üçün həyata keçirilən son dəqiqəlik xilasetmə razılaşması sayəsində 64 restoran fəaliyyətini davam etdirəcək və 1.277 işçi işini qoruyacaq. Lakin 68 restoranın bağlanması, daha 75 filialın isə gələcəyinin qeyri-müəyyən qalması gözlənilir.
Şirkət rəsmi olaraq “iflasdan xilas proseduru”nda
İngiltərədəki əməliyyatlara nəzarət edən Yum! III (UK) Limited adlı şirkətin müraciəti əsasında başlanan bu prosesdə, brendin ana şirkəti olan ABŞ mərkəzli Yum! Brands Inc. artıq əməliyyatların idarəsinə nəzarət edir.
Şirkətin beynəlxalq əməliyyatlar üzrə rəhbəri Nicolas Burquier bildirib ki, bu alımın məqsədi müştəri təcrübəsini qorumaq və mümkün qədər çox iş yerini saxlamaqdır:
“Əsas prioritetimiz satılan restoranlarda fəaliyyətin davamlılığını təmin etmək və işçilərə keçid dövründə dəstək olmaqdır.”
İngiltərədə tətbiq edilən bu hüquqi prosedur (“administration”) şirkətin tam iflas etmədən idarəçiliyi müvəqqəti olaraq başqa quruma təhvil verməsi və borcların qaytarılmasını hədəfləyən bərpa mexanizmi kimi tanınır.
Pizza Hut bir il əvvəl də eyni böhrandan keçmişdi
Pizza Hut restoranlarını idarə edən DC London Pie Limited şirkəti cəmi bir il əvvəl bu zənciri iflasdan almışdı. Lakin satışlardakı azalma və artan xərclər səbəbilə şirkət indi yenidən mali çətinliklə üzləşib.
Bu vəziyyət, İngiltərədə 740-dan çox işçinin gələcəyini qeyri-müəyyən vəziyyətdə qoyub.
Boykotlar satışları kəskin azaltdı
Qəzzadakı müharibə və İsrailin hərbi əməliyyatlarına qarşı artan beynəlxalq boykot kampaniyaları Pizza Hut və ona bağlı digər qlobal brendlərin satışlarına ciddi təsir göstərib.
Rəsmi məlumatlara görə, Pizza Hut-ın Yaxın Şərq və Afrika bölgəsindəki satışları ötən ilin son rübündə 3%, KFC-nin isə 5% azalıb. Şirkət Qərbi Asiyada xüsusilə Fələstinlə həmrəy istehlakçılar tərəfindən boykot siyahısına salınıb.
Pizza Hut bundan əvvəl də – 2017-ci ildə – aclıq grevində olan fələstinli məhbuslarla istehza edən bir paylaşımına görə beynəlxalq qınağa tuş gəlmiş və daha sonra rəsmi üzr istəmişdi.
Analitiklər: “Boykotların iqtisadi təsiri genişlənəcək”
İqtisadçılar bildirirlər ki, Qəzza soyqırımına dolayı yolla dəstək verən və İsrail ilə əməkdaşlıq edən beynəlxalq şirkətlər yaxın aylarda daha geniş maliyyə çətinlikləri ilə üzləşə bilərlər.
Ekspertlərə görə, “müəssisələrin sosial məsuliyyətini nəzərə almayan korporativ siyasət uzunmüddətli etibar itkisinə səbəb olur”.
