Qətərin mövqeyi
Qətər Baş naziri və xarici işlər naziri Məhəmməd bin Abdurrahman Əl Sani ABŞ Prezidenti Donald Trampın elan etdiyi “Qəzza Münaqişəsini Bitirəcək Geniş Plan”la bağlı açıqlama verib. Onun sözlərinə görə, plan hələ yalnız əsas prinsiplərdən ibarətdir və detalları müzakirələr nəticəsində dəqiqləşməlidir.
Əl Sani deyib: “Qəzza planının əsas məqsədi müharibəni dayandırmaqdır. Amma İsrailin geri çəkiləcəyi bölgələr və Qəzzanın idarə olunması kimi mühüm başlıqlarda daha çox danışıqlara ehtiyac var.”
Həmasın mövqeyi
Qətər rəsmisi bildirib ki, plan artıq Həmasa təqdim olunub və hərəkat məsələni məsuliyyətlə nəzərdən keçirəcək. Son qərar isə digər fələstinli qruplarla aparılacaq məsləhətləşmələrdən sonra açıqlanacaq. Əl Saninin sözlərinə görə, hazırda sadəcə ümumi prinsiplər ortaya qoyulub və təfərrüatlar üzərində işləmək vacibdir.
Qətərin prioriteti: humanitar böhranın dayandırılması
Qətər Baş naziri öncəliyin müharibəni, aclığı və məcburi köçü dayandırmaq olduğunu vurğulayıb. Onun sözlərinə görə, planın ən aydın maddəsi döyüşlərin dayandırılmasıdır, lakin İsrailin geri çəkilməsinə dair detallarda qeyri-müəyyənlik qalır. “Bu məsələ Vaşinqtonla müzakirə edilməli və daha şəffaf olmalıdır” – deyə o, əlavə edib.
Netanyahuya cavab
Əl Sani İsrail Baş naziri Benyamin Netanyahunun Dohaya hücumlarla bağlı üzr istəməsinə də münasibət bildirib: “Bu bir lütf deyil, ən sadə hüquqdur. Əsas məsələ oxşar pozuntuların təkrarlanmamasıdır.”
Trampın planının əsas məqamları
Tramp planı bir neçə gün öncə Netanyahu ilə birlikdə açıqlamışdı. ABŞ lideri təklifin qəbul olunması halında İsrailin Qəzzədən mərhələli şəkildə çəkiləcəyini, əsirlərin azad ediləcəyini, lakin Hamaşın prosesdə rol almayacağını demişdi.
Netanyahu isə İsrailin Qəzzənin böyük hissəsini işğalda saxlayacağını, müstəqil Fələstin dövlətinin qurulmasının gündəmdə olmadığını iddia edib.
Al Sani isə vurğulayıb ki, Misir və Türkiyə ilə birgə Hamaş nümayəndələri ilə aparılan danışıqlarda əsas məqsəd müharibənin dayandırılması və planın fələstinlilərin hüquqlarını qoruyacaq bir məcraya yönəldilməsi olub.
