Qərb mediasında geniş müzakirə
Müctəba Xameneinin İranın İslam İnqilabı və İslam Respublikasının yeni ali lideri seçilməsi Qərb mediasında geniş müzakirələrə səbəb olub. Bir sıra nüfuzlu beynəlxalq nəşrlər bu qərarı İranın siyasi iradəsinin nümayişi və ABŞ-a açıq mesaj kimi qiymətləndirib.
ABŞ-ın “New York Times” qəzeti yazıb ki, bu seçim Tehran rəhbərliyinin həm ABŞ-a, həm də İsrailə qarşı siyasi mövqeyini qorumaq niyyətində olduğunu göstərir. Nəşrə görə, lider seçimi ölkənin ciddi geosiyasi gərginlik dövründə belə siyasi sistemin davamlılığını nümayiş etdirir.
Müqavimət siyasətinin davamı
Böyük Britaniyanın “Financial Times” qəzeti isə qeyd edib ki, Müctəba Xameneinin seçilməsi İranın uzun müddətdir davam etdirdiyi müqavimət siyasətinin davam edəcəyinə işarədir.
Nəşr vurğulayıb ki, bəzi analitiklər bu qərarın müharibə şəraitində təxirə salınacağını proqnozlaşdırsa da, Tehran əksinə olaraq lider seçimini sürətlə həyata keçirdi.
ABŞ-ın “Wall Street Journal” qəzeti də bu qərarı Donald Tramp administrasiyasının İran üzərində siyasi təzyiq strategiyasının uğursuzluğu kimi qiymətləndirib. Məqalədə qeyd olunur ki, Tehran Vaşinqton və Təl-Əvivlə davam edən qarşıdurmada geri çəkilmək niyyətində deyil.
ABŞ mediası: İran qarşıdurma yolunu seçdi
ABŞ-da fəaliyyət göstərən “HuffPost” nəşri isə yazıb ki, İran kompromis əvəzinə qarşıdurma yolunu seçdiyini nümayiş etdirib. Qəzetin təhlilinə görə, Əli Xameneinin oğlu Müctəbanın lider seçilməsi ABŞ prezidenti Donald Trampa qarşı açıq siyasi çağırış kimi qiymətləndirilir.
Britaniyanın məşhur “The Economist” jurnalı da bu məsələyə toxunaraq qeyd edib ki, İran cəmiyyətində Vaşinqtonun gözlədiyi daxili üsyan və ya geniş narazılıq əlamətləri müşahidə olunmur.
Jurnalın təhlilinə görə, ABŞ administrasiyasının İran daxilində hakimiyyətə qarşı ciddi etirazların baş verəcəyi ilə bağlı gözləntiləri özünü doğrultmayıb.
Trampın mövqeyi
ABŞ prezidenti Donald Tramp isə daha əvvəl Müctəba Xameneinin İranın ali lideri olmasına açıq şəkildə qarşı çıxmışdı. O, ABŞ-ın “Axios” saytına verdiyi müsahibədə bu nəticəni “qəbuledilməz” adlandırmışdı.
Tramp həmçinin bildirmişdi ki, İranın yeni liderinin seçilməsi prosesində şəxsi şəkildə iştirak etməlidir və Vaşinqton Əli Xameneinin siyasətini davam etdirəcək yeni lideri qəbul etməyəcək.
Xatırladaq ki, İranın Rəhbərlik Ekspertlər Şurası 8 mart 2026-cı ildə Müctəba Xameneini ölkənin İslam İnqilabı və İslam Respublikasının üçüncü ali lideri seçib. O, bu vəzifədə şəhid olan əvvəlki lider Şəhid Ayətullah Seyid Əli Xameneinin yerinə keçib.
