Yedioth Ahronoth qəzeti yazır ki, İsrail ordusunun paraşütçü briqadasının bir komandiri Qəzzada binaların daha sürətli dağıdılması üçün yeni bir metod hazırlayıb. Bu üsula görə, əvvəlcə kiçik bir dron binanın damına yüngül sursat ataraq deşik açır, sonra isə onlarla kiloqram partlayıcı daşıyan böyük dron həmin dəlikdən içəri daxil olur və uzaqdan partladılır.
Ordunun açıqlamasına görə, bu metodla 2–4 mərtəbəli bir binanın dağıdılması üçün tələb olunan vaxt təxminən bir saatdan cəmi bir neçə dəqiqəyə — bəzən üç dəqiqəyə qədər enir.
Qəzet əlavə edib ki, “Gideonun Arabaları” adlı əməliyyata qatılan zabitlər etiraf ediblər: Qəzzadakı missiyaların çoxu əslində “dağıntı müqavilələri”nə bənzəyib — Xan Yunis və Rəfahda məhəllələrin və yaşayış ərazilərinin tam və sistematik məhvini əhatə edib.
Məlumatda deyilir ki, İsrail qüvvələri əksər hallarda partizan müharibəsi ilə üzləşir və düşməni birbaşa görmür; öldürmələrin çoxu uzaqdan həyata keçirilir. Əsgərlər etiraf ediblər ki, “Həmas” geniş dron və müşahidəçi şəbəkəsinə sahibdir, onlar işğalçı ordunun zəif nöqtələrini müəyyənləşdirərək kiçik qruplar halında pusquya keçir.
Qəzet həmçinin yazır ki, İsrail ordusunda ciddi canlı qüvvə çatışmazlığı qeyri-adi hallara səbəb olub. Məsələn, bir neçə həftə əvvəl Qolani Briqadasının 12-ci batalyonuna aid “Tiger” zirehli maşını tuneldən qısa müddətlik çıxan fələstinli döyüşçü tərəfindən minalanaraq partladılıb. Hadisə nəticəsində bir əsgər ölüb, doqquz nəfər yaralanıb.
Yedioth Ahronoth qeyd edib ki, bu hadisə “Həmas”ın birbaşa hərbi qarşıdurmadan imtina edərək kiçik hüceyrələrlə partizan müharibəsinə qayıtdığının göstəricisidir.
Hesabatda vurğulanıb ki, İsrail ordusunun komandanlığı bu vəziyyətin davam etməsinin 2025-ci ilə planlaşdırılan “sabitlik ili”ni yenidən gecikdirəcəyindən narahatdır. Bu tarix artıq 2026-cı ilə təxirə salınıb. Ordunun Baş Qərargah rəisi Eyəl Zamir isə iki illik müharibədən sonra ordunu normal təlim rejiminə qaytarmaq və ya ən azı əsir mübadiləsi ilə qısa bir fasilə əldə etmək niyyətində idi.
