Rusiya Prezidenti Vladimir Putin, Ukrayna müharibəsi ilə bağlı “tunelin sonunda işıq göründüyünü” bildirərək, Ukrayna Prezidenti Vladimir Zelenskini Moskvaya dəvət edib və onunla görüşməyə hazır olduğunu açıqlayıb.
Çinə etdiyi dörd günlük səfərin sonunda Pekində rus jurnalistlərinin suallarını cavablandıran Putin, Rusiya ilə Çin arasında təbii qaz ticarəti üzrə əldə olunan razılaşmaya toxunaraq deyib:
“Rus qazının boru kəmərləri ilə Çinə ixracı illik 100 milyard kubmetrə çata bilər. Dünyanın ən böyük enerji istehlakçısı olan Çin, bazar formuluna əsaslanan qiymətlə qaz alacaq və bundan faydalanacaq.”
Zelenski ilə görüşməkdən heç vaxt imtina etmədiyini vurğulayan Putin, ABŞ Prezidenti Donald Trampın da ona belə bir görüşün mümkünlüyü barədə sual verdiyini bildirib.
Putin əlavə edib:
“Belə bir görüş üçün yaxşı hazırlıq aparılmalıdır. Əgər Zelenski hazırdırsa, qoy Moskvaya gəlsin və bu görüş baş tutsun.”
O, sağlam düşüncənin üstün gələcəyi təqdirdə Ukrayna məsələsində həll yoluna çatmağın mümkünlüyünü qeyd edərək deyib:
“Tramp administrasiyası da həll üçün səmimi səylər göstərir. Məncə tunelin sonunda müəyyən bir işıq göründü. Gəlin vəziyyətin necə inkişaf edəcəyini izləyək. Əks halda, müəyyən etdiyimiz vəzifələri hərbi yolla həll etməli olacağıq.”
Ukrayna ilə İstanbul danışıqları
Putin, Ukraynanın NATO-ya üzvlüyünə qarşı olduqlarını bir daha təkrarlayıb və ərazi mübadiləsi müqabilində təhlükəsizlik zəmanəti vermək kimi bir planlarının olmadığını vurğulayıb.
O, Ukrayna əraziləri ilə bağlı referendum keçirilməsinin vacibliyini bildirərək deyib:
“Ancaq hərbi vəziyyət şəraitində referendum mümkün deyil. Bu isə o deməkdir ki, əvvəlcə hərbi vəziyyət ləğv olunmalıdır. Bu baş verən kimi isə prezident seçkiləri keçirilməlidir. Proses sonsuza qədər belə davam edə bilər.”
Putin həmçinin İstanbulda keçirilmiş birbaşa danışıqlarda Rusiya nümayəndə heyətinə rəhbərlik edən Vladimir Medinskinin fəaliyyətindən razı qaldığını qeyd edib və Ukrayna ilə danışıqlarda nümayəndə heyətinin səviyyəsini artırmağa hazır olduqlarını bildirib.
