Pezeşkianın Nyu-Yorka səfəri öncəsi açıqlamaları
İran Prezidenti Məsud Pezeşkianın bu gün Nyu-Yorka, BMT Baş Assambleyasının iclasına yola düşməzdən əvvəl jurnalistlərə mühüm bəyanatlar verib. O, ölkəsinin beynəlxalq arenadakı prinsipial mövqeyini bir daha açıqlayaraq sülh və ədalətin əsas prioritet olduğunu vurğulayıb.
Pezeşkian bildirib ki, zorla öz fikrini qəbul etdirmək istəyən qüvvələrlə real danışıqlar aparmaq mümkün deyil:
“Kim təzyiq və hegemonluq yolu ilə danışıqlara yanaşırsa, onunla razılıq əldə etmək mümkün deyil”.
İsrailin Qəzzaya hücumları gündəmdə
Prezident çıxışında İsrailin Qəzzaya qarşı davamlı hava hücumlarına da toxunub. O qeyd edib ki, bu hücumlar dünyanın “mədəniyyət, demokratiya və insan haqları” dəyərlərini müdafiə etdiyini iddia edən ölkələrin açıq dəstəyi ilə həyata keçirilir.
Pezeşkian əlavə edib:
“İsrail yeganə təhlükəsizliyini qorumaq hüququna malik tərəf deyil. Bu dünyada yaşayan hər kəsin təhlükəsizliyi təmin olunmalıdır”.
Dialoq və humanizm çağırışı
İran Prezidenti bir daha beynəlxalq ictimaiyyətə dialoq və əməkdaşlıq mesajı göndərib:
“Əgər biz həqiqətən humanistiksə və ədalət axtarırıqsa, bir-birimizlə ancaq dialoq yolu ilə anlaşa bilərik”.
Onun sözlərinə görə, Nyu-Yorkda keçiriləcək BMT Baş Assambleyası çərçivəsində İran tərəfi özünün dəyişməz mövqeyini – sülh, insanlıq, təhlükəsizlik, hüquq və ədalət prinsiplərini – açıq şəkildə müdafiə edəcək.
BMT Baş Assambleyası və Fələstinin tanınması
Xatırladaq ki, dünən – sentyabrın 22-də BMT Baş Assambleyasının iclası Nyu-Yorkda start götürüb. İclasda mühüm siyasi hadisə də qeydə alınıb: Fransa rəsmən Fələstini tanıdığını elan edib. Bununla da, Paris artıq bu addımı atan beş ölkəyə qoşulmuş oldu. Qərarın əsas məqsədi “iki dövlətli həll” yolunu dəstəkləmək və Qəzzadakı müharibənin dayandırılmasına töhfə verməkdir.
