Pezeşkian: Eyni düşüncə Vaşinqtonda qalır
İran Prezidenti Məsud Pezeşkian ABŞ-nin İkinci Dünya müharibəsinin sonunda Yaponiyanın Hiroşima və Naqasaki şəhərlərinə atom bombası atmasının ildönümü ilə əlaqədar açıqlama verib.
Pezeşkian bildirib ki, həmin faciəni qəbul etməyən və onun dəhşətlərini rədd edən hər kəs bu gün Vaşinqtonda mövcud olduğunu iddia etdiyi eyni yanaşmanı da qınamalıdır.
İran Prezidentinin sözlərinə görə, sözügedən yanaşma bu gün dövlətləri məhv etməklə və mülki infrastrukturu dağıtmaqla hədələyir.
Pezeşkian bu cür faciələrin yenidən yaşanmasına imkan verilməməli olduğunu vurğulayıb. Onun açıqlaması ABŞ-nin xarici siyasətinə yönəlmiş tənqidlər fonunda səsləndirilib.
“İran müharibə və ərazi genişlənməsi istəmir”
İran xalqına müraciətinin son hissəsində Pezeşkian ölkəsinin regional və beynəlxalq siyasəti ilə bağlı mövqeyinə də aydınlıq gətirib.
Prezident bildirib ki, İran nə müharibə, nə də ərazi genişlənməsi niyyətindədir. Onun sözlərinə görə, Tehran yalnız müdafiə imkanlarını və milli təhlükəsizliyini qorumaq hüququnda israrlıdır.
Pezeşkian qeyd edib ki, İrana qarşı təzyiq və təhdidlər dayandırılarsa, mövcud gərginliyin davam etməsi üçün də əsas qalmayacaq.
“Təzyiqlərə boyun əyməyəcəyik”
İran Prezidenti ölkəsinin heç bir dövləti təhdid və ya təzyiq yolu ilə güzəştə məcbur etmək niyyətində olmadığını bildirib.
Bununla yanaşı, Pezeşkian İranın xarici təzyiqlərə də boyun əyməyəcəyini vurğulayıb. O, özünümüdafiənin İran İslam Respublikasının təbii hüququ olduğunu bildirib.
Prezidentin sözlərinə görə, Tehran gərginliyin genişlənməsinin qarşısını almağa çalışır, lakin ölkənin təhlükəsizliyini və milli maraqlarını mümkün təhdidlər qarşısında müdafiə etməyə hazırdır.
“İranı 48 saata nəzarətə götürəcəklərini düşünürdülər”
Pezeşkian bundan əvvəl İran xalqına müraciətinin ilk hissəsində ölkəsinin son dövrdə üzləşdiyi daxili və xarici təzyiqlərdən də danışmışdı.
O iddia etmişdi ki, İranın rəqibləri ölkəyə nəzarəti qısa müddətdə ələ keçirə biləcəklərini düşünürdülər. Prezident bununla bağlı Suriyanı nümunə göstərərək rəqiblərin oxşar ssenarinin İranda da 48 saat ərzində həyata keçirilə biləcəyini hesab etdiklərini söyləmişdi.
Pezeşkianın sözlərinə görə, İran qarşılaşdığı çətinliklərə və müharibəyə baxmayaraq dövlət idarəçiliyini davam etdirib və ölkənin regional güc mövqeyini qoruyub.
Mövcud dövrü ən çətin mərhələ adlandırdı
İran Prezidenti ölkənin İslam inqilabından sonrakı ən çətin dövrlərindən birini yaşadığını bildirib.
Onun fikrincə, xarici təzyiqlərin əsas məqsədlərindən biri İran daxilində ictimai narazılığın artırılması və ölkədə sabitliyin zəiflədilməsidir.
Pezeşkian bildirib ki, xalqla dövlət arasında birlik qorunduğu müddətdə İran İslam Respublikasının süquta uğradılması mümkün olmayacaq. O, İran xalqının indiyədək ölkəsini və gələcəyini müdafiə etdiyini və bundan sonra da müqavimət göstərməyə davam edəcəyini vurğulayıb.
