Pezeşkian: Sanksiyalara qarşı real mübarizə aparılmalıdır
İran Prezidenti Məsud Pezeşkian Hindistanın paytaxtı Yeni Dehlidə keçirilən BRİKS-in 18-ci Liderlər Sammitində çıxış edərək birtərəfli sanksiyalar, regional təhlükəsizlik və beynəlxalq əməkdaşlıq məsələlərinə toxunub.
Pezeşkian ABŞ-ın İrana qarşı tətbiq etdiyi sanksiyaları tənqid edərək bildirib ki, bu cür məhdudiyyətlərin təsiri yalnız dövlət strukturları və iqtisadi göstəricilərlə məhdudlaşmır. Onun sözlərinə görə, sanksiyalar ölkələrin inkişafına mane olmaqla yanaşı, uşaqların, xəstələrin və adi insanların gündəlik həyatına da birbaşa təsir göstərir.
İran Prezidenti bu səbəbdən birtərəfli sanksiyalara qarşı mübarizənin yalnız siyasi bəyanatlarla məhdudlaşdırılmamasını istəyib.
“Bu məsələ BRİKS üçün prioritet olmalıdır”
Pezeşkian çıxışında birtərəfli və “qeyri-insani” adlandırdığı sanksiyalara qarşı ciddi və əməli mübarizənin BRİKS üzvləri, eləcə də müstəqil dövlətlər üçün əsas məsələlərdən birinə çevrilməli olduğunu vurğulayıb.
İran rəhbərinin sözlərinə görə, bu istiqamətdə ölkələr arasında iqtisadi və siyasi əməkdaşlığın gücləndirilməsi xarici təzyiqlərin təsirinin azaldılmasına imkan verə bilər.
Pezeşkian İranın BRİKS çərçivəsində iqtisadi əlaqələrin genişləndirilməsini və siyasi koordinasiyanın gücləndirilməsini dəstəklədiyini bildirib.
Pezeşkian regional təhlükəsizliyin şərtini açıqladı
İran Prezidenti çıxışında regional təhlükəsizlik məsələsinə də geniş yer ayırıb. Onun fikrincə, uzunmüddətli və davamlı təhlükəsizlik yalnız dövlətlərin bir-birinin suverenliyinə və ərazi bütövlüyünə qarşılıqlı hörmət göstərməsi şəraitində təmin edilə bilər.
Pezeşkian “bəziləri üçün təhlükəsizlik, digərləri üçün təhlükə” yanaşmasının qəbul edilməz olduğunu vurğulayıb.
O bildirib ki, heç bir dövlət öz ərazisinin qonşu ölkəyə qarşı hücumların həyata keçirilməsi üçün istifadə edilməsinə imkan verməməlidir. İran Prezidenti bunu bölgədə sabitliyin qorunmasının əsas şərtlərindən biri kimi qiymətləndirib.
Nüvə obyektlərinə hücumlarla bağlı çağırış
Pezeşkian BRİKS ölkələrinə ayrıca müraciət edərək mülki infrastruktura və dinc məqsədlərlə fəaliyyət göstərən nüvə obyektlərinə hücumların adi hala çevrilməsinə qarşı açıq və qəti mövqe nümayiş etdirməyə çağırıb.
Onun sözlərinə görə, belə hücumların qəbul edilən təcrübəyə çevrilməsi beynəlxalq sülh və təhlükəsizlik üçün ciddi təhlükə yarada bilər.
İran Prezidenti BRİKS və Birləşmiş Millətlər Təşkilatının Nizamnaməsi çərçivəsində siyasi əməkdaşlığın daha da gücləndirilməsinin vacibliyini bildirib.
BRİKS daxilində əməkdaşlığın genişləndirilməsi istənilir
Pezeşkian iqtisadi əməkdaşlıqla yanaşı, elm, texnologiya, energetika və ərzaq təhlükəsizliyi sahələrində də BRİKS ölkələri arasında əlaqələrin yeni səviyyəyə qaldırılmasının tərəfdarı olduqlarını bildirib.
İran Prezidentinin fikrincə, bu əməkdaşlıq xüsusilə Qlobal Cənub ölkələrinin maraqlarına xidmət etməli və onların beynəlxalq iqtisadi sistemdə imkanlarının genişləndirilməsinə şərait yaratmalıdır.
Pezeşkianın Yeni Dehlidəki çıxışının əsas mesajlarından biri BRİKS-in yalnız iqtisadi əməkdaşlıq platforması kimi deyil, həm də birtərəfli təzyiqlərə qarşı ortaq mövqe formalaşdıra biləcək siyasi qüvvə kimi fəaliyyət göstərməsinin vacibliyi olub.
