ABŞ Prezidenti Donald Trampın problemləri güc yolu ilə həll etmə üsulunu dəyərləndirən Kremlin sözçüsü Dmitri Peskov bildirib ki, bu təzyiqə boyun əyənlər gələcəkdə də boyun əyməyə davam edəcəklər, əsas məsələ isə Rusiyanın bunu etməməsidir.
Kremlin sözçüsü Dmitri Peskov Rusiya mətbuatına verdiyi müsahibədə dünya gündəminə dair qiymətləndirmələr aparıb.
ABŞ Prezidenti Donald Trampın problemləri güc yolu ilə həll etmə metoduna toxunan Peskov, “Bu təzyiqə boyun əyənlər gələcəkdə də boyun əyəcəklər, əsas olan Rusiyanın bunu etməməsidir” deyə vurğulayıb.
Peskov qeyd edib ki, dünya hazırda dramatik şəkildə dəyişir və bu dəyişiklik prosesi davam etməkdədir.
Hazırkı “acınacaqlı Avropa siyasətçi nəslinin” Trampın iddialı və aqressiv mövqeyinə qarşı dura biləcək durumda olmadığına diqqət çəkən Peskov, ABŞ ilə Avropa İttifaqı (Aİ) arasında inkişaf edən vəziyyətin isə Avropada uzun illərdir hökm sürən ikiüzlülüyün məhsulu olduğunu bildirib.
Peskov, “Trampın (Fransa Prezidenti Emmanuel) Makronla yazışmalarını yayımlaması Avropanı ayağa qaldırmışdı, lakin Makronun (Rusiya Prezidenti Vladimir) Putinlə apardığı danışıqları yayımlaması zamanı belə bir reaksiya verilmədi” deyə qeyd edib.
Kremlin sözçüsü Trampın tətbiq etdiyi metodların Rusiyanın çoxqütblü dünya yanaşması ilə tam şəkildə üst-üstə düşmədiyini bildirib.
Avropada hakimiyyətdə olan siyasətçilərin deqradasiyaya uğradığının açıq şəkildə göründüyünü, bu şəxslərin səriştəsiz olduqlarını vurğulayan Peskov, enerji sahəsində Rusiyadan müvəqqəti asılılıqdan qurtulan Avropanın indi isə ABŞ-dan asılı vəziyyətə düşdüyünü qeyd edib.
“Rusiya ordusu Qrenlandiyada ‘Qızıl Qübbə’ raketdən müdafiə sisteminin mümkün yerləşdirilməsi ilə bağlı planları diqqətlə araşdıracaq” deyən Peskov, Qrenlandiyanın mövqeyinin Rusiyanın strateji təhlükəsizliyi baxımından mühüm əhəmiyyət daşıdığını vurğulayıb.
