Keçmiş baş nazirə sığınacaq böhranı
Peru hökuməti Meksika ilə diplomatik münasibətlərin kəsildiyini elan edib. Qərarın səbəbi Meksikanın Lima şəhərindəki səfirlik iqamətgahında keçmiş baş nazir Betssi Çavesə siyasi sığınacaq verməsi olub.
Perunun xarici işlər naziri Huqo de Zela mətbuat konfransında bildirib ki, bu addım “dostluq ruhuna zidd” sayılır və iki ölkə arasında artıq uzun müddətdir davam edən gərginliyin son mərhələsidir.
Nazir deyib: “Bu dostça olmayan davranış və Meksikanın keçmiş və hazırkı prezidentlərinin Peru-nun daxili işlərinə davamlı müdaxilələri nəzərə alınaraq, hökumət bu gündən etibarən Meksika ilə diplomatik əlaqələri kəsmək qərarına gəlib.”
Meksika səfirliyində sığınacaq gərginliyi
De Zela həmçinin qeyd edib ki, keçmiş baş nazir Betssi Çaves, devrilmiş prezident Pedro Kastillonun çevriliş cəhdində “mümkün ortaq” kimi araşdırılır. O, hazırda Meksikanın Lima səfirliyinin iqamətgahında siyasi sığınacaq istəyib.
“Bu xəbəri böyük təəssüf və təəccüblə qarşıladıq,” – deyə nazir vurğulayıb və Meksikanın bu qərarını “daxili işlərə açıq müdaxilə” kimi dəyərləndirib.
Əlaqələrdə gərginlik uzun müddətdir davam edir
İki ölkə arasında münasibətlər son illərdə ardıcıl gərginliklərlə müşahidə olunur. 2023-cü ilin may ayında Peru Konqresi, Meksikanın sabiq prezidenti Andres Manuel Lopes Obradoru ölkənin “arzuolunmaz şəxsi” elan etmişdi.
Həmin qərar, Obradorun Peru siyasətinə dair açıqlamaları və devrilmiş prezident Kastillonun müdafiəsinə görə qəbul edilmişdi.
Keçmişdən gələn diplomatik böhran
Bu, Peru və Meksika arasında ilk sığınacaq böhranı deyil. Daha əvvəl də Meksika hökuməti, Pedro Kastillonun ailə üzvlərinə siyasi sığınacaq vermişdi. Həmin hadisə iki ölkə arasında münasibətlərin ciddi şəkildə soyumasına səbəb olmuşdu.
Hazırda Lima hökumətinin qərarı iki ölkə arasında diplomatik kanalların tamamilə bağlanması deməkdir. Beynəlxalq müşahidəçilər bu addımı Latın Amerikası diplomatiyasında “nadir və ciddi hadisə” kimi qiymətləndirirlər.
