Paşinyan: “Zəngəzur dəhlizi” müzakirələrin bir hissəsi olmayıb
Ermənistan Baş naziri Nikol Paşinyan BMT Baş Assambleyasının 80-ci sessiyasında çıxış edərək “Zəngəzur dəhlizi” ifadəsini sərt şəkildə tənqid edib. O bildirib ki, bu termin heç vaxt rəsmi sənədlərdə və ya Ermənistan-Azərbaycan danışıqlarında yer almayıb.
“Ərazi iddiası kimi qəbul olunur”
Paşinyan Azərbaycan Prezidenti İlham Əliyevin dəfələrlə “Zəngəzur dəhlizi” ifadəsini işlətməsinə diqqət çəkərək deyib:
“Bu söz nə Vaşinqton Bəyannaməsində, nə də Ermənistan-Azərbaycan müzakirələrində qeyd olunub. Ermənistan cəmiyyətində bu, ərazi iddiası və münaqişə ritorikası kimi anlaşılır.”
ABŞ-la TRIPP layihəsi
Baş nazir həmçinin ABŞ-la birlikdə həyata keçiriləcək “Beynəlxalq Sülh və Rifah üçün Tramp Marşrutu” (TRIPP) infrastruktur layihəsindən danışıb. Onun sözlərinə görə, bu layihə Ermənistan ərazisində həyata keçiriləcək və çərçivə ABŞ-la ikitərəfli razılaşmalar əsasında müəyyən olunacaq.
Paşinyan vurğulayıb ki, layihənin icrasında “barışa xidmət edən və ziddiyyət yaratmayan dil” istifadə olunmalıdır.
“Azərbaycan tərəfi açıqlama verməlidir”
Ermənistan Baş naziri əlavə edib:
“Azərbaycanlı həmkarım bu ifadəni işlədərkən nəyi nəzərdə tutduğunu aydınlaşdırmalıdır. Çünki Ermənistan üçün bu termin təxribatçı məna daşıyır.”
