Şimal-qərbi Pakistanda kütləvi köç dalğası
Pakistanın şimal-qərbində yerləşən dağlıq və ucqar ərazilərdən on minlərlə insan son həftələr ərzində evlərini tərk edib. “Reuters” agentliyinin məlumatına görə, məscidlər vasitəsilə yayımlanan xəbərdarlıqlarda ailələrə mümkün hərbi əməliyyatdan öncə ərazini tərk etmələri tövsiyə olunub. Xəbərdarlıqların “Taliban – Pakistan” silahlı qruplaşmasına qarşı əməliyyat ehtimalı ilə bağlı olduğu bildirilir.
Tirə dərəsindən qaçış
Əfqanıstanla həmsərhəd olan Xeybər Paxtunxva əyalətindəki Tirə dərəsinin sakinləri bildiriblər ki, güclü qar yağışı və sərt qış şəraitinə baxmayaraq, yaxın qəsəbələrə köçmək məcburiyyətində qalıblar. Yerli əhalinin sözlərinə görə, yayımlanan elanlarda yaxın zamanda silahlı toqquşmaların baş verə biləcəyi barədə xəbərdarlıq edilib.
Yerli rəsmilər minlərlə ailənin artıq ərazini tərk etdiyini və onların qonşu yaşayış məntəqələrində qeydiyyata alındığını açıqlayıb. Bununla belə, Pakistan hökuməti rəsmi olaraq nə təxliyə qərarı, nə də planlaşdırılan hərbi əməliyyat barədə açıqlama verib.
Strateji və riskli bölgə
Tirə dərəsinin uzun illərdir təhlükəsizlik baxımından həssas ərazi hesab olunur və “Taliban – Pakistan” qruplaşmasının əsas dayaq nöqtələrindən biri kimi tanınır. Bu qruplaşma illərdir Pakistan təhlükəsizlik qüvvələrinə qarşı hücumlar həyata keçirir və bölgədə gərginlik davam edir.
Müdafiə nazirindən təkzib
Pakistanın müdafiə naziri Xəvaca Məhəmməd Asif çərşənbə axşamı günü Tirə dərəsində hər hansı planlaşdırılmış və ya davam edən hərbi əməliyyatın olmadığını bəyan edib. Nazir köçü “sərt qış şəraiti ilə əlaqədar mövsümi və adi hərəkətlilik” kimi qiymətləndirib.
Mənbələr fərqli danışır
Bununla belə, məlumatlı hərbi mənbə “Reuters”ə bildirib ki, köç prosesi aylar davam edən məsləhətləşmələrdən sonra baş verib. Mənbənin sözlərinə görə, tayfa ağsaqqalları, regional rəsmilər və təhlükəsizlik orqanları Tirə dərəsində silahlıların mülki əhali arasında hərəkət etməsi və onlara təzyiq göstərməsi məsələsini müzakirə ediblər.
Mənbə əlavə edib ki, mülki əhalinin müvəqqəti köçməsi onların təhlükəsizliyini təmin etmək məqsədi daşıyır və hazırda yalnız məhdud, hədəfli kəşfiyyat əməliyyatları aparılır. Dağlıq relyef və qış şəraiti səbəbindən genişmiqyaslı hücum planlaşdırılmır.
Regional rəhbərlikdən etiraz
Xeybər Paxtunxva əyalətinin baş naziri Süheyl Afridi ötən həftə açıqlamasında bildirib ki, Tirə dərəsində əhalinin köçürülməsi və ya hər hansı təhlükəsizlik əməliyyatı ilə bağlı regional hökumətlə məsləhətləşmə aparılmayıb. O, qərarların “qapalı qapılar arxasında” qəbul edildiyini deyib və federal hökumətin açıqlamalarını təkzib edib.
Sakinlər: “Soyuq səbəb deyil”
Bölgə sakinləri də köçün yalnız qış şəraiti ilə izah olunmasını rədd edirlər. Abdul Rahim adlı sakin bildirib ki, illərdir bu ərazidə qış sərt keçir, lakin heç vaxt belə kütləvi köç olmayıb. Digər sakinlər isə yol boyu uşaqların həyatını itirdiyini, ailələrin günlərlə qarda ilişib qaldığını deyiblər.
Təhlükəsizlik fonunda artan gərginlik
Qeyd edək ki, ötən şənbə Pakistan polisi Əfqanıstan sərhədi yaxınlığında toy mərasimini hədəf alan intihar hücumu nəticəsində ölənlərin sayının yeddiyə çatdığını açıqlamışdı. Bu hadisə ölkədə silahlı hücumların yenidən artdığına dair narahatlıqları gücləndirib.
