Beş illik fasilədən sonra yenidən Britaniya səmasında
Pakistan Beynəlxalq Hava Yolları (PIA) beş ildən sonra Böyük Britaniyaya kommersiya uçuşlarını bərpa etdiyini açıqlayıb. Qərar, pilotların saxta lisenziyalara malik olması ilə bağlı araşdırmaların tamamlanması və təhlükəsizlik standartlarının yenidən təsdiqlənməsindən sonra qəbul edilib.
İngiltərə Mülki Aviasiya Administrasiyası (CAA) və Avropa Hava Təhlükəsizliyi Agentliyi (EASA) tərəfindən aparılan genişmiqyaslı yoxlamalardan sonra PIA-nın ölkəyə uçuşlarına qoyulan qadağalar ləğv olunub.
İlk uçuş İslamabaddan Mançesterə
Şirkət açıqlamasında bildirib ki, ilk bərpa olunmuş reys İslamabaddan Mançester şəhərinə həyata keçirilib. Uçuşun uğurla başa çatması Pakistan aviasiya sektorunda mühüm dönüş nöqtəsi kimi qiymətləndirilir.
İslamabad Beynəlxalq Hava Limanında keçirilən mərasimdə çıxış edən Pakistanın müdafiə naziri Xavaja Məhəmməd Asıf deyib:
“Mançester reysi bizim üçün mühüm başlanğıcdır. Növbəti addım Londra və Birmingem istiqamətlərini bərpa etməkdir. Bu xəttləri ən qısa zamanda yenidən açmağı planlaşdırırıq.”
Qadağaya səbəb olan faciə
Xatırladaq ki, 22 may 2020-ci ildə PIA-nın 8303 nömrəli Lahordan Kəraçiyə uçan sərnişin təyyarəsi qəzaya uğramışdı. Təyyarədə olan 99 nəfərdən yalnız iki sərnişin sağ qurtulmuşdu.
Hadisə ilə bağlı aparılan araşdırmalarda bir çox pilotun saxta uçuş lisenziyasına malik olduğu aşkarlanmış, bu isə həm Pakistan, həm də beynəlxalq aviasiya dairələrində ciddi qalmaqala səbəb olmuşdu.
Bundan sonra Avropa Hava Təhlükəsizliyi Agentliyi (EASA), eləcə də Böyük Britaniya və ABŞ Pakistan Beynəlxalq Hava Yollarının uçuşlarına qadağa qoymuşdu.
Etimadın bərpası istiqamətində addım
Beş il davam edən təhlükəsizlik islahatları, pilotların yenidən sertifikatlaşdırılması və aviasiya infrastrukturunun təkmilləşdirilməsi nəticəsində PIA beynəlxalq etimadı qismən bərpa edə bilib.
Ekspertlər bildirirlər ki, Britaniya reyslərinin bərpası Pakistan aviasiyasının imicinin yaxşılaşması və iqtisadi əlaqələrin canlanması baxımından mühüm əhəmiyyət daşıyır.
Şirkət rəhbərliyi yaxın aylarda Londra və Birmingem istiqamətlərində də reyslərin açılacağını, daha sonra isə Avropa qitəsinin digər şəhərlərinə uçuşların planlaşdırıldığını açıqlayıb.
