ABŞ mediasından diqqətçəkən iddia
The New York Times qəzetinin yaydığı məlumata görə, ABŞ administrasiyası İranla danışıqların davam etdiyi dövrdə İsrailin İranın xarici işlər naziri Abbas Əraqçi və parlamentin sədri Məhəmməd Baqir Qalibafa qarşı mümkün sui-qəsd planı hazırlamış ola biləcəyini qiymətləndirib.
Nəşrin məlumatı adları açıqlanmayan ABŞ rəsmilərinə istinadən verilib.
Vaşinqtonun narahatlığı
Məlumata görə, ABŞ administrasiyası belə bir hadisənin Tehranla aparılan danışıqlar prosesini ciddi şəkildə poza biləcəyindən narahat olub.
Qəzet iddia edir ki, Vaşinqton bu səbəbdən İsrailə planlaşdırıldığı bildirilən addımdan geri çəkilməsi ilə bağlı mesaj göndərib.
Region ölkələrinə də xəbərdarlıq edildiyi bildirilir.
Xəbərdə bildirilir ki, ABŞ bölgədəki bəzi ölkələrdən İranı mümkün təhlükə barədə məlumatlandırmağı xahiş edib.
Bununla yanaşı, iddiaya görə, Tehran vasitəçilər üzərindən Vaşinqtondan yüksək səviyyəli rəsmilərinin təhlükəsizliyi ilə bağlı təminat istəyib.
Rəsmi təsdiq yoxdur
Məqalədə yer alan məlumatlarla bağlı nə ABŞ, nə İsrail, nə də İran tərəfindən hələlik rəsmi açıqlama verilməyib.
