ABŞ sənədləri Epşteynin maliyyə əlaqələrini üzə çıxardı
ABŞ Ədliyyə Nazirliyinin açıqladığı rəsmi sənədlər həbsxanada ölü tapılan milyarder Cefri Epşteynin İsrail ordusuna və Fələstin torpaqlarını qəsbedən işğalçı strukturlarına maliyyə dəstəyi verdiyini ortaya qoyub. Sənədlər Epşteynin illər ərzində müxtəlif israilli təşkilatlara ianələr etdiyini və bu yardımların işğal siyasəti ilə birbaşa əlaqəli qurumlara yönəldiyini göstərir.
Məlumatlara görə, Epşteynin 2005-ci ilə aid vergi bəyannamələrində Sionist rejim Müdafiə Qüvvələrinin Dostları Dərnəyinə 25 min dollar, Yəhudi Milli Fonduna 15 min dollar və Yəhudi Qadınlar Milli Şurasına 5 min dollar ianə etdiyi qeyd olunub. Həmin sənədlərdə bu maliyyə axınının İsrail ordusuna və İordan çayının qərb sahilindəki işğalçı məskunlaşmaların dolayısı ilə dəstəklənməsinə xidmət etdiyi açıq şəkildə göstərilib.
E-poçt yazışmaları diqqət çəkdi
“Fələstində heç vaxt müstəqil dövlət olmayıb”
Sənədlər arasında Epşteynin 2012-ci ildə göndərdiyi bir elektron məktub da yer alıb. Həmin yazışmada onun “Fələstində heç vaxt müstəqil bir ərəb və ya fələstinli dövləti mövcud olmayıb” ifadəsini işlətməsi diqqət çəkib. Bu mövqe Epşteynin ideoloji baxımdan da sionist rejimin işğal siyasətinə yaxın olduğunu göstərən nümunə kimi dəyərləndirilir.
Açıqlanan məlumatlar Epşteynin sadəcə maliyyəçi deyil, həm də siyasi baxışları ilə işğalçı mövqeyi açıq şəkildə dəstəklədiyini ortaya qoyur.
Netanyahu təkzib etmişdi
Sionist rejimin cinayətkar baş naziri Benyamin Netanyahu daha əvvəl Epşteynin İsrail üçün çalışdığına dair iddiaları qəti şəkildə rədd etmişdi. O, Epşteynlə İsrailin keçmiş baş naziri Ehud Barak arasındakı yaxın münasibətlərə işarə edərək, bunun Epşteynin İsrail adına fəaliyyət göstərdiyi anlamına gəlmədiyini bildirmişdi.
Netanyahu eyni zamanda Barakı illərdir İsrail demokratiyasını zəiflətməkdə ittiham edib. Lakin yeni açıqlanan ABŞ sənədləri bu təkziblərə baxmayaraq, Epşteynin İsrail ordusu və işğalçı strukturlarla maliyyə əlaqələrinin mövcud olduğunu təsdiqləyir.
FBI sənədlərində müəmmalı detallar
Dəfn mərasimi və “aktiv hesab” iddiası
ABŞ Federal Təhqiqat Bürosunun sənədlərində Epşteynin dəfn mərasimi ilə bağlı da diqqətçəkən məlumatlar yer alıb. Bildirilir ki, mərasim zamanı jurnalistlər boş tabutlarla yayındırılıb, əsl cənazə isə başqa bir nəqliyyat vasitəsi ilə aparılıb.
Bundan əlavə, sosial mediada Epşteynin ölmədiyi və İsrail üçün çalışdığına dair iddialar yenidən gündəmə gəlib. Sənədlərdə “littlestjeff1” adlı istifadəçi hesabının Epşteynin ölümündən illər sonra “Fortnite” oyununda aktiv olduğu irəli sürülür. Həmin hesabın İsraildən istifadə edildiyi iddiası isə müzakirələri daha da alovlandırıb.
İddialar beynəlxalq rezonans doğurur
Açıqlanan məlumatlar Epşteyn qalmaqalını yeni mərhələyə daşıyıb və onun fəaliyyətlərinin yalnız şəxsi cinayətlərlə məhdudlaşmadığı, eyni zamanda siyasi və hərbi strukturlarla əlaqəli olduğu barədə sualları artırıb. ABŞ sənədləri əsasında aparılan müzakirələr yaxın dövrdə həm İsraildə, həm də beynəlxalq arenada daha da dərinləşə bilər.
