Netanyahu “peycer” əməliyyatının gizli detallarını açıqladı
İşğalçı rejimin qatil baş naziri Benyamin Netanyahu ilk dəfə olaraq Livanda baş verən “Peycer” partlayışı və Hizbullah baş katibi, şəhid Həsən Nəsrullahın hədəfə alınması barədə təfərrüatları ictimaiyyətə açıqlayıb.
Netanyahu “Maariv” qəzetinə verdiyi müsahibəsində bildirib ki, İsrail hökuməti şimal cəbhəsində müharibə üçün tarix müəyyənləşdirdiyi bir vaxtda, Hizbullahın iki ədəd “Peycer” cihazını yoxlama üçün İrana göndərdiyi məlum olub:
“Sual verdim, bu nə vaxt olub? Dedilər: bir həftə əvvəl. Mən də dərhal qərara gəldim ki, əməliyyatı həyata keçirməliyik”, – deyə Netanyahu bildirib.
Həsən Nəsrullahın hədəfə alınması qərarı
Netanyahu həmçinin Hizbullah lideri Həsən Nəsrullahın hədəfə alınması məsələsinə də toxunub. O, həmin vaxt Təhlükəsizlik Kabinetinin iclasında fikir ayrılıqlarının olduğunu, lakin son qərarı şəxsi təşəbbüsü ilə verdiyini deyib:
“BMT Baş Assambleyasında çıxış üçün yola düşərkən təyyarədə təhlükəsiz xətt vasitəsilə əlaqə saxladım və qərar verdim: bunu edəcəyik.”
Netanyahu əlavə edib ki, ABŞ-ı bu qərardan əvvəlcədən xəbərdar etməyib, çünki “amerikalılara desəydik, məlumat beş dəqiqə içində sızardı”.
İran və Qətərlə bağlı açıqlamalar
İsrail baş naziri həmçinin İranla bağlı planlarının davam etdiyini vurğulayıb:
“Bu məsələ hələ bitməyib. Keçən həftə ABŞ prezidenti Donald Trampla danışdım. Lazım gələrsə, hərəkətə keçməyə hazırıq.”
Netanyahu müsahibəsində Qətərə qarşı həyata keçirilən hücum planlarından da bəhs edib. O, bu məsələdə ABŞ rəhbərliyi, xüsusilə də Donald Trampla koordinasiyanın olduğunu bildirib.
Siyasi gələcəyi barədə
Netanyahu siyasi gələcəyi ilə bağlı da danışaraq qarşıdakı seçkilərdə yenidən namizədliyini irəli sürəcəyini açıqlayıb.
“Mən inanıram ki, qalib gələcəyəm,” – deyə o qeyd edib.
İsrailin “Maariv” qəzeti eyni zamanda keçirdiyi sorğunun nəticələrini də dərc edib. Sorğuya əsasən, son atəşkəs razılaşması və israilli əsirlərin qaytarılması hökumətin reytinqini 4 mandat artırıb.
Regionda yeni gərginlik ehtimalı
Siyasi müşahidəçilər hesab edirlər ki, Netanyahu tərəfindən açıqlanan bu bəyanatlar Livan və İranla münasibətləri yenidən gərginləşdirə bilər. Ekspertlərin fikrincə, İsrailin son addımları regionda yeni qarşıdurma riskini artırır.
