“Neftçi” Yevlaxda son dəqiqələrdə sevindi
Misli Premyer Liqasında 16-cı turun oyunları davam edir. Günün ilk qarşılaşması Yevlax şəhər stadionunda baş tutub. Yerli Karvan-Yevlax komandası öz meydanında Neftçini qəbul edib.
Görüşə daha fəal başlayan meydan sahibləri ilk hissənin sonlarında hesabı açıblar. Araz Abdullayevin 45+8-ci dəqiqədə penaltidən vurduğu qol “Karvan-Yevlax”ı fasiləyə üstün yollayıb. Lakin ikinci hissədə təşəbbüsü ələ alan “Neftçi” oyunun taleyini dəyişə bilib.
61-ci dəqiqədə Bassala Sambu hesabı bərabərləşdirib. Matçın son anlarında isə “Neftçi”nin kapitanı Emin Mahmudov 90+7-ci dəqiqədə penaltidən dəqiq zərbə endirərək komandasına 2:1 hesablı qələbə qazandırıb.
Bu nəticədən sonra “Karvan-Yevlax” 6 xalla turnir cədvəlinin sonuncu – 12-ci pilləsində qalıb. “Neftçi” isə aktivinə 3 xal əlavə edərək 20 xalla 8-ci pilləyə yüksəlib. Komandalar arasında Bakıda keçirilən ilk dövrə oyunu isə qolsuz bərabərliklə başa çatmışdı.
“Zirə” evdə qələbəni əldən verdi
Günün ikinci qarşılaşması Zirə İdman Kompleksinin stadionunda oynanılıb. Paytaxt təmsilçisi Zirə doğma azarkeşləri önündə İmişli ilə üz-üzə gəlib.
Matç boyunca hər iki komanda ehtiyatlı oyun nümayiş etdirib. Qol imkanları yaradılsa da, tərəflər bunlardan yararlana bilməyib və qarşılaşma 0:0 hesablı heç-heçə ilə yekunlaşıb.
Bu nəticədən sonra “Zirə” 28 xalla turnir cədvəlinin 3-cü pilləsində qərarlaşıb. “İmişli” isə 17 xalla 9-cu sırada yer alır. Qeyd edək ki, bu komandalar arasında ilk dövrənin oyunu da bərabərliklə başa çatmışdı – 1:1.
Turun növbəti oyunları
16-cı turun qalan qarşılaşmaları qarşıdakı günlərdə keçiriləcək. Dekabrın 21-də “Qəbələ” – “Qarabağ”, “Araz-Naxçıvan” – “Şamaxı” oyunları baş tutacaq. Tur dekabrın 22-də “Sumqayıt” – “Sabah” görüşü ilə yekunlaşacaq. Turun ilk oyununda isə “Kəpəz” evdə “Turan Tovuz”a 0:2 hesabı ilə məğlub olub.
