Həbsdə dini inanca görə təzyiq
Həbsdə olan Müsəlman Birliyi Hərəkatının (MBH) üzvü Tərlan Sayadovun Umbakı Qapalı Həbsxanasında “karser”ə salınaraq döyülüb. Bu barədə Müsəlman Birliyi Hərəkatı rəsmi “Facebook” səhifəsində məlumat yayıb və baş verənləri dini inanca görə təzyiq kimi qiymətləndirib.
Birliyin yaydığı bəyanata görə, Tərlan Sayadov dekabrın 10-da ailəsi ilə telefon danışığı zamanı yaşadıqları barədə məlumat verə bilib. Onun sözlərinə əsasən, noyabrın 28-də Umbakı Qapalı Həbsxanasına köçürüldüyü gün fiziki zorakılığa məruz qalıb və ardınca “karser”ə salınıb.
“Namaz üçün səccadə istədim, cəzalandırıldım”
Sayadov bildirib ki, ona qarşı tətbiq edilən cəzanın əsas səbəbi namaz qılması üçün səccadə tələb etməsi olub. Onun sözlərinə görə, saxlanıldığı mühit natəmiz olduğu üçün birbaşa yerə səcdə etməyin mümkün olmadığını bildirib.
“Burada ətraf natəmiz olduğuna görə namaz qılmaq üçün səccadə istədim. Umbakıya gələndə öz səccadəmi də götürmüşdüm, lakin karantin otağında onu görmədim. Nəzarətçiyə dedim ki, natəmiz yerdə namaz qıla bilmərəm. Buna kobud reaksiya verdilər”, – deyə Sayadov ailəsinə ötürdüyü məlumatda qeyd edib.
Onun bildirdiyinə görə, daha sonra bir neçə müəssisə əməkdaşı gələrək onu “daxili qaydaları pozmaqda” və “əməkdaşla kobud davranmaqda” ittiham edib. Nəticədə Sayadova 12 gün müddətinə “karser” cəzası verildiyi deyilir.
Fiziki zorakılıq
MBH bəyanatında vurğulanır ki, Sayadov “karser”ə salınmazdan əvvəl döyülüb. Hərəkat bu hadisəni təkcə bir şəxslə bağlı insident deyil, həbsxana sistemində dini inanclara qarşı münasibətin göstəricisi kimi dəyərləndirir. Birlik bildirir ki, bu cür hallar mütəmadi xarakter daşıyır və ictimaiyyətin diqqətindən kənarda saxlanılır.
Keçmiş ittihamlar və köçürülmə
Qeyd edək ki, Tərlan Sayadov 2025-ci il iyulun 23-də narkotik maddələrlə bağlı ittiham əsasında 3 il müddətinə azadlıqdan məhrum edilib. MBH isə bu ittihamın saxta olduğunu və Sayadovun dini fəaliyyəti səbəbilə həbs olunduğunu iddia edir.
Bundan əlavə, noyabrın 4-də Sayadov 13 saylı Cəzaçəkmə Müəssisəsindən “daxili qaydaları pozmaq” ittihamı ilə 6 ay müddətinə qapalı rejimli Umbakı həbsxanasına köçürülüb. Hərəkat bu köçürülməni də təzyiq tədbiri kimi qiymətləndirir.
Rəsmi qurumlardan açıqlama yoxdur
Hazırda məsələ ilə bağlı Penitensiar Xidmət və digər rəsmi qurumlar tərəfindən hər hansı açıqlama verilməyib. Hüquq müdafiəçiləri isə iddiaların araşdırılmasını, saxlanılan şəxslərin dini etiqad azadlığının təmin olunmasını tələb edirlər.
