Müqtəda Sədr Sudandakı faciəyə diqqət çəkdi
İraqın Milli Şiə Hərəkatının lideri Müqtəda Sədr Sudanda, xüsusilə də ölkənin qərbində yerləşən Şimal Darfur əyalətinin paytaxtı Əl-Fəşr şəhərində baş verən qanlı hadisələri kəskin şəkildə pisləyib. O, şənbə günü sosial şəbəkə “X” üzərindən paylaşdığı bəyanatda Sudanda davam edən qətliamları “insanlığa qarşı cinayət” adlandırıb.
Sədr bildirib ki, Sudandakı humanitar böhran getdikcə dərinləşir və bunun əsas səbəbi “regional siyasi müdaxilələr və münaqişənin silahla qızışdırılmasıdır”. Onun sözlərinə görə, bu müdaxilələr nəticəsində ölkədə aclıq, epidemiya və kütləvi ölümlər yayılıb.
“Əl-Fəşrdə uşaqlar öldürülür, qadınların namusu tapdalanır”
Müqtəda Sədr, Əl-Fəşrdə baş verən hadisələri təsvir edərkən, “uşaqların öldürülməsi, qadınlara qarşı zorakılıq və kütləvi edamlar” kimi halları misal gətirib. O, bu əməlləri “rəzil bir silahlı dəstənin törətdiyi insanlıq dramı” adlandıraraq, bütün mənəvi və dini dəyərlərin bu hadisələri lənətlədiyini vurğulayıb.
“Dünya susduqca fəlakət böyüyür”
Sədr həmçinin ərəb, islam və beynəlxalq ictimaiyyətin susqunluğunu tənqid edib. O, bəyan edib ki, “dünya bu cür terror xarakterli cinayətlərə səssiz qaldıqca, insanlıq anlayışını itirir”.
İraq lideri beynəlxalq təşkilatları və regional dövlətləri Sudana silah göndərmək əvəzinə, humanitar yardım göstərməyə çağırıb. O, öz hərəkatının da yardım prosesinə qoşulmağa hazır olduğunu bəyan edib:
“Əgər humanitar yardım mexanizmləri açılarsa, biz Sudandakı qardaşlarımıza yardım çatdırmağa hazırıq.”
BMT: Əl-Fəşr nəzarətə alındı, yüzlərlə insan öldürülüb
Birləşmiş Millətlər Təşkilatının İnsan Haqları İdarəsi dünən açıqlama yayıb. Açıqlamada bildirilir ki, Sudan Silahlı Qüvvələri ilə paramilitar “Sürətli Dəstək Qüvvələri” arasında gedən döyüşlər nəticəsində yüzlərlə mülki şəxs və silahsız döyüşçü həlak olub.
BMT-nin məlumatına əsasən, “Sürətli Dəstək Qüvvələri” 18 aylıq mühasirədən sonra ötən bazar günü Əl-Fəşr şəhərinə tam nəzarət ələ alıb. Bu şəhər Sudan ordusunun Darfur bölgəsindəki son istehkamı hesab olunurdu.
Sədr çıxışının sonunda dünyanı Qəzza faciəsini də xatırlamağa çağıraraq, beynəlxalq susqunluğun həm Sudanda, həm də Fələstində insanlığın məğlubiyyətinə çevrildiyini bildirib.
