Qəzzaya humanitar yardımın yeni mərhələsi
Misirin Rəfah keçidi istiqamətində humanitar yardımlarla yüklənmiş yeni karvan hərəkətə başlayıb. Məlumata görə, humanitar yardım daşıyan 95-ci karvan Misir tərəfdən Rəfah sərhəd-keçid məntəqəsinə doğru yola salınıb və yaxın vaxtlarda Qəzza sektoruna daxil olması gözlənilir. Karvanın hərəkəti bölgədə davam edən ağır humanitar vəziyyət fonunda həyata keçirilən yardım səylərinin davamı kimi qiymətləndirilir.
Misir mətbuatının məlumatına əsasən, Misir Qızıl Aypara Cəmiyyətinin əməkdaşları çətin hava şəraitinə baxmayaraq, yardımın vaxtında və təhlükəsiz şəkildə çatdırılması üçün fasiləsiz fəaliyyət göstərir. Bildirilir ki, güclü külək və əlverişsiz iqlim şərtləri logistik prosesi çətinləşdirsə də, yardım qrupları işlərini davam etdirir.
Minlərlə ton yardım yükü
Açıqlamalara görə, 95-ci humanitar yardım karvanı Qəzzaya göndərilən yardım silsiləsinin tərkib hissəsidir və minlərlə ton müxtəlif təyinatlı yükü əhatə edir. Karvana ərzaq məhsulları, sığınacaq və yaşayış üçün nəzərdə tutulan ləvazimatlar, eləcə də yanacaq və neft məhsulları daxildir. Məqsəd uzun müddətdir müharibə və blokada şəraitində yaşayan Qəzza əhalisinin artan ehtiyaclarını qismən də olsa qarşılamaqdır.
Misir Qızıl Aypara Cəmiyyəti bu yardımların “Zadül-İzzə… Misirdən Qəzzaya” adlı humanitar təşəbbüs çərçivəsində həyata keçirildiyini bildirib. Sözügdən təşəbbüsün ilk karvanı bu ilin 27 iyul tarixində yola salınıb və o vaxtdan etibarən Qəzza üçün ardıcıl yardım göndərişləri davam etdirilir.
Yardımlar ehtiyacları tam qarşılamır
Qeyd olunur ki, Qəzza sektorunda atəşkəs razılaşmasının əldə olunmasından iki aydan artıq vaxt keçməsinə baxmayaraq, bölgəyə daxil olan humanitar yardımlar real ehtiyaclarla müqayisədə xeyli azdır. Müharibə, aclıq, xəstəliklər və infrastrukturun dağılması əhalinin həyat şəraitini son dərəcə ağırlaşdırıb. Üstəlik, son dövrlərdə hava şəraitinin pisləşməsi də insanların gündəlik yaşamını daha da çətinləşdirib.
Beynəlxalq ictimaiyyət atəşkəsdən sonra humanitar yardımın həcminin artırılacağına dair öhdəliklər versə də, sahədəki vəziyyət bunun tam reallaşmadığını göstərir. Məlumatlara görə, İsrailin bir sıra əsas və həyati əhəmiyyətli məhsullara tətbiq etdiyi məhdudiyyətlər səbəbindən Qəzzaya daxil olan yardım yükü minimum tələbatı belə qarşılamaqda çətinlik çəkir.
Humanitar təşkilatlar bildirir ki, mövcud məhdudiyyətlər aradan qaldırılmadığı təqdirdə, bölgədəki humanitar böhranın daha da dərinləşməsi riski qalmaqdadır.
