Microsoft İsrailə bəzi xidmətlərini bağladı
ABŞ mərkəzli texnologiya şirkəti Microsoft, Qəzza və İordan çayının qərb sahilindəki fələstinli mülki şəxslərin kütləvi izlənməsi üçün xidmətlərinin istifadə edildiyinə dair sübutların ortaya çıxmasından sonra İsrail Müdafiə Nazirliyinə göstərilən bəzi bulud və süni intellekt xidmətlərini dayandırdığını açıqlayıb.
Brad Smith-in açıqlaması
Microsoft-un vitse-prezidenti Brad Smith şirkət əməkdaşlarına ünvanladığı məktubda bu qərarı təsdiqləyib:
“Microsoft-un İsrail Müdafiə Nazirliyinin bir qurumuna göstərdiyi bir sıra xidmətləri dayandırdığını və deaktiv etdiyini bildirmək istəyirəm.”
Smith xatırladıb ki, The Guardian qəzetinin 6 avqust tarixli reportajında İsrail Ordusunun (IDF) Qəzza və İordan çayının qərb sahilində fələstinlilərin telefon danışıqları vasitəsilə toplanan məlumatları Microsoft-un Azure platformasında saxladığı iddia olunmuşdu.
İstintaq nəticələri
Microsoft daxili araşdırmalar apararaq bu iddiaların bir hissəsini təsdiqləyən sübutlar əldə edib. Şirkətin məlumatına görə, İsrail Müdafiə Nazirliyi Hollandiya üzərindən həm Azure bulud yaddaşından, həm də süni intellekt xidmətlərindən istifadə edib.
Bu səbəbdən Microsoft, Nazirliyin bəzi xidmətlərə və abunəliklərə çıxışını rəsmən dayandırmaq barədə qərar qəbul edib.
Şirkətin mövqeyi
Brad Smith bildirib ki, bu addım Microsoft-un İsrail və Orta Şərqin digər ölkələrinin kibertəhlükəsizliyinə dəstəyinə təsir göstərməyəcək. Araşdırmaların hələ də davam etdiyini vurğulayan Smith əlavə edib:
-
Microsoft-un texnologiyaları heç bir halda kütləvi izləmə məqsədilə istifadə olunmamalıdır.
-
Şirkət müştərilərinin məxfilik hüququna hörmətlə yanaşır və onları qorumağı öhdəsinə götürür.
Smith həmçinin qeyd edib:
“Biz hökumət və ya dövlət deyilik, sadəcə bir şirkətik. Hər bir şirkət kimi hansı məhsul və xidmətləri təqdim edəcəyimizə özümüz qərar veririk.”
