Misir ilk hissədə üstün oldu
2026 FIFA Dünya Kubokunun 1/8 finalında Misir oyuna daha inamlı başladı və 15-ci dəqiqədə Attianın ötürməsindən sonra İbrahimin baş zərbəsi ilə hesabı açdı.
Argentina ilk hissədə topa daha çox nəzarət etsə də, Misirin qapıçısı Şobeyr ardıcıl möhtəşəm seyvlərlə komandasını oyunda saxladı. O, Lionel Messinin penaltısını dəf etdi, həmçinin Aleksis Mak Allister və Xulian Alvaresin təhlükəli zərbələrinin qarşısını aldı.
Messi 31-ci dəqiqədə cərimə zərbəsindən də fərqlənməyə yaxın olsa da, top dirəyə dəyərək meydanı tərk etdi.
Misir fərqi artırdı, Argentina möhtəşəm dönüş etdi
İkinci hissədə Misir üstünlüyünü davam etdirdi. VAR müdaxiləsi ilə bir qolu ləğv edilən Ziko 68-ci dəqiqədə Salahın başladığı hücumun ardından topu qapıya göndərərək hesabı 2:0 etdi.
Lakin bundan sonra oyunun gedişi tamamilə dəyişdi.
79-cu dəqiqədə Messinin ötürməsindən sonra Kristian Romero baş zərbəsi ilə fərqi azaltdı.
83-cü dəqiqədə isə Messinin zərbəsi dirəyə dəyərək qapıya daxil oldu və hesab bərabərləşdi.
Artırılan vaxtın ikinci dəqiqəsində Lautaro Martinesin ötürməsini Enso Fernandes başla tamamlayaraq Argentinaya 3:2 hesablı qələbə qazandırdı.
Bu nəticə ilə son dünya çempionu Argentina dörddəbir finala yüksəldi və növbəti mərhələdə İsveçrə–Kolumbiya cütünün qalibi ilə qarşılaşacaq.
Messi həm rekord yenilədi, həm də arzuolunmaz göstəriciyə imza atdı
Lionel Messi Misirə vurduğu qolla Dünya Kuboku tarixindəki qol sayını 21-ə çatdıraraq öz rekordunu daha da yaxşılaşdırdı.
39 yaşlı futbolçu ardıcıl qol vurduğu Dünya Kuboku oyunlarının sayını da 9-a yüksəltdi.
Bununla yanaşı, Messi qaçırdığı penalti ilə Dünya Kuboku tarixində əsas vaxtda ən çox penalti qaçıran futbolçu oldu. O, indiyədək istifadə etdiyi 8 penaltidən 4-nü qola çevirə bilməyib.
Həmçinin Messi eyni Dünya Kuboku ərzində iki penalti qaçıran ilk futbolçu kimi də tarixə düşüb.
