Makronun tarixi açıqlaması
Fransa prezidenti Emmanuel Makron Fələstin dövlətini tanıyacaqlarını bəyan edib. O, bu barədə ABŞ-ın “X” sosial şəbəkəsində ivrit və ərəb dillərində paylaşım edərək məlumat verib.
Makronun sözlərinə görə, o, Fələstin rəhbəri Mahmud Abbasla telefon danışığı aparıb və Qəzza daxil olmaqla bütün Fələstin torpaqlarında yaranmış “təcili vəziyyət” fonunda Fransa hökumətinin Fələstin dövlətini tanımaq niyyətində olduğunu bildirib.
Tanınma 22 sentyabrda olacaq
Makron, tanınmanın sentyabrın 22-də ABŞ-ın Nyu-York ştatında həyata keçiriləcəyini açıqlayıb. Onun sözlərinə görə, bu addım Fransa tərəfindən irəli sürülmüş sülh planının tərkib hissəsidir.
“Fələstin rəhbərliyinə tələblərimizi bir daha çatdırdım. Prezident Abbas isə rəhbərliyi yeniləmək və gələcək Fələstin dövlətinin sabitliyini təmin etmək üçün islahatlara sadiqliyini ifadə etdi,” – deyə Makron vurğulayıb.
İslahat və sabitlik çağırışı
Makron, Fransa hökumətinin Fələstin rəhbərliyinə bu yolda dəstək olacağını və bölgənin təhlükəsizliyi ilə bağlı öhdəliklərin yerinə yetirilməsinə nəzarət edəcəyini qeyd edib.
Ekspertlər bu açıqlamanı Fransa diplomatiyası üçün tarixi dönüş nöqtəsi kimi qiymətləndirirlər. Makronun bəyanatı Avropada Fələstin dövlətini tanımaqla bağlı müzakirələri də gücləndirə bilər.
Beynəlxalq reaksiyalar gözlənilir
Analitiklərin fikrincə, Fransa kimi böyük bir Avropa ölkəsinin bu addımı regionda siyasi dinamikanı dəyişdirə və beynəlxalq ictimaiyyətin Fələstin məsələsinə münasibətində mühüm rol oynaya bilər.
