Madurodan sərt xəbərdarlıq
Venesuela prezidenti Nikolas Maduro bu gün keçirdiyi mətbuat konfransında ölkəsinə qarşı artan təhlükələr barədə xəbərdarlıq edib. O bildirib ki, regionda, xüsusilə də Puerto-Riko ətrafında minlərlə əsgərin yerləşdirilməsi Venesuelaya qarşı “işğal hazırlığı” anlamına gəlir.
“Nüvə təhdidi və hərbi mühasirə”
Maduro vurğulayıb ki, ABŞ Karib dənizində hərbi gəmilərini yerləşdirərək beynəlxalq hüququ pozur. Onun sözlərinə görə, Venesuela bu şəraitdə özünün qanuni müdafiə haqqını həyata keçirməyə məcburdur:
“Əgər həyatımızı qorumaq üçün silaha sarılmaq lazım gələrsə, biz bunu edəcəyik.”
Prezident əlavə edib ki, Venesuelanın silahlı qüvvələri artıq mərhələli müdafiə planlarının bir hissəsini açıqlayıb.
ABŞ-ı saxta bəhanələrdə günahlandırdı
Maduro ABŞ-ın Venesuelaya qarşı ittihamlarını əsassız adlandırıb. O, yaxın günlərdə yayılan və guya Venesuela donanmasına aid gəminin hücuma məruz qaldığını göstərən videonun həqiqiliyini şübhə altına alıb:
“Bu görüntü əvvəllər Yaxın Şərqdə yayılan saxta videoları xatırladır. Onun gerçək olub-olmadığını ABŞ prezidenti araşdırmalıdır.”
Maduroya görə, yeganə dövlət ki, beynəlxalq qanunları pozur, ABŞ-dır – həm Venesuelada, həm də digər ölkələrdə.
Karib dənizində gərginlik artır
Son həftələrdə ABŞ administrasiyası bölgəyə üç “Aegis” tipli raketdən müdafiə gəmisi göndərib. Eyni zamanda, təxminən 4000 dəniz piyadasının bölgəyə yerləşdirilə biləcəyi iddia olunur. Karakas isə bunu regionda sülh və sabitliyə açıq təhdid kimi dəyərləndirir.
“Biz müharibə yox, sülh istəyirik”
Maduro Venesuelanın dialoq və sülh tərəfdarı olduğunu vurğulayıb. Onun sözlərinə görə, xalq psixoloji müharibə və hədə-qorxular qarşısında geri çəkilməyəcək.
Narkotik qaçaqmalçılığına qarşı əməliyyat
Mətbuat konfransında Maduro ölkənin narkotik qaçaqmalçılığına qarşı mübarizəsini də xatırladıb. O, həmin gün qanuni əməliyyat nəticəsində kokain daşıyan bir gəminin saxlanıldığını və qaçaqçıların həbs olunduğunu açıqlayıb.
ABŞ-la gərginlik davam edir
Xatırladaq ki, sentyabrın əvvəlində Maduro ABŞ-ın Venesuelaya qarşı hərbi təzyiqlərinin “ölkəni əsarət altına alma planı” olduğunu bildirmişdi. ABŞ prezidenti Donald Tramp isə avqustun sonunda Karib dənizinə əlavə hərbi qüvvələrin göndərilməsi barədə göstəriş vermişdi.
