Madurodan ABŞ-a sərt mesaj: “Venesuela ələ keçirilə bilməz”
Venesuela Prezidenti Nikolás Maduro xüsusi televiziya proqramında regional vəziyyət, ABŞ-ın Karib dənizi ətrafındakı hərbi fəaliyyətləri və ölkəsinə yönəlik təhdidlər barədə açıqlamalar verib. O, Vaşinqtonun mümkün hərbi müdaxiləsinə diqqət çəkərək bildirib ki, ölkəyə qarşı aparılan psixoloji və siyasi təzyiqlərə baxmayaraq, Venesuela xalqı dövlətinə sadiq qalır və geniş dəstək göstərir.
Maduro deyib: “Aylardır davam edən psixoloji və siyasi müharibəyə baxmayaraq, təsvir olunması mümkün olmayan qədər dəstək mesajları alırıq. Nə etsələr, necə etsələr, Venesuelanı ələ keçirə bilməyəcəklər.”
“Venesuela yenilməzdir”
Prezident əlavə edib ki, ABŞ-ın çoxşaxəli hücumu qarşısında ölkə güclü iradə nümayiş etdirir: “Venesuelanı məğlub edə bilməyəcəklər. Biz yenilməz bir xalqıq. İndiyə qədər bacarmadıqları kimi bundan sonra da heç vaxt bacarmayacaqlar.”
Maduro həmçinin qeyd edib ki, Venesuela xalqının ona dəstəyi 70 faiz səviyyəsinə çatıb. Onun sözlərinə görə, ABŞ-ın hərbi təhdidləri xalq tərəfindən qəbul edilmir və müxalifətin müdaxilə çağırışları da cəmiyyət tərəfindən rədd olunur.
“Öz-özünə yetən iqtisadi model qururuq”
Venesuela lideri ölkəsinin son illərdə neftdən asılılığı azaltdığını, iqtisadiyyatı gücləndirmək üçün müəyyən edilmiş 13 strateji sektor üzrə istehsalın artırıldığını bildirib. Maddi istehsalın genişləndirilməsi ilə daha güclü ixrac strukturu qurmağı hədəflədiklərini vurğulayıb.
Maduro deyib: “Öz-özünə yetən bir istehsal gücü yaradırıq. Bununla daxili bazarı təmin edəcəyik və həm özəl sektorun, həm də yerli icmaların iqtisadi gücünə güvənirik. Təhlükəsizlik bizim əsas prioritetimizdir və xalq bu təhlükəsizliyin ən böyük təminatçısıdır.”
ABŞ-la gərginlik artır
ABŞ dünən Maduro və digər yüksək vəzifəli venesuelalı rəsmilərin başçılıq etdiyini iddia etdiyi “Cartel de los Soles” təşkilatını Xarici Terrorçu Təşkilatlar siyahısına daxil edib. Karakas bu addımı ölkəyə müdaxilə üçün bəhanə yaratmaq cəhdi kimi qiymətləndirib.
Bundan əvvəl ABŞ “narkotiklə mübarizə” bəhanəsi ilə dünyanın ən böyük təyyarədaşıyan gəmisi USS Gerald R. Ford və ona bağlı hücum qrupunu Latın Amerikası bölgəsinə göndərmişdi.
Maduro isə cavab olaraq ölkədə 4,5 milyon könüllü milis qüvvəsini səfərbər etdiyini və istənilən xarici hücumu dəf etməyə hazır olduqlarını bəyan edib.
