Mərmərə dənizində təhlükəli sızıntı: tanker heyətində zəhərlənmə
İstanbul yaxınlığında, Demokrasiya və Azadlıqlar Adasından (Yassıada) təxminən 2 mil cənubda yerləşən Panama bayraqlı Swanlake tankerində bu gün ciddi insident baş verib. İstanbul Valiliyi axşam saatlarında zəhərlənmə barədə qayıqdan daxil olan məlumatı təsdiqləyib və hadisənin sızıntı nəticəsində baş verdiyini açıqlayıb.
İlkin dəyərləndirmələrə əsasən, tankerin “soyuq tank” adlanan bölməsində yaranan kimyəvi sızıntı nəticəsində 1 rusiyalı heyət üzvü həyatını itirib. Zəhərlənən digər iki heyət üzvü isə hazırda tibbi nəzarət altındadır.
Hadisə yerinə xilasedici qruplar cəlb olundu
İhbar saat 17:30-da daxil olduqdan sonra bölgəyə Sahil Mühafizəsi, Dəniz Polisi, UMKE və AFAD-ın Kimyəvi, Radioloji, Bioloji və Nüvə Təhlükəsizlik (KRBN) qrupları göndərilib. Xilasedicilər tankerdə təhlükənin böyüməsinin qarşısını almaq üçün tədbirlər görür, heyətin sağlamlıq vəziyyətini yoxlayırlar.
Valiliyin açıqlamasına görə, gəmidə ümumilikdə 13 rusiyalı heyət üzvü olub. Onlardan 10 nəfərin təxliyəsi davam etdirilir, iki yaralının isə vəziyyəti nəzarətdə saxlanılır.
Valilikdən rəsmi açıqlama
İstanbul Valiliyi hadisə ilə bağlı belə bəyanat yayıb:
“19.11.2025 tarixində saat 17:30-da Demokrasiya və Azadlıqlar Adasının 2 mil cənubunda yerləşən Panama bayraqlı Swanlake tankerində zəhərlənmə hadisəsi barədə məlumat daxil olmuşdur. Hadisə yerinə Sahil Mühafizəsi, Dəniz Polisi, UMKE və AFAD KRBN qrupları cəlb edilmişdir. İlkin araşdırmaya əsasən, hadisənin tankerin soyuq tankında yaranan sızıntıdan qaynaqlandığı ehtimal edilir. 1 heyət üzvü həyatını itirmiş, 2 heyət üzvü zəhərlənərək nəzarət altına alınmışdır. Gəmidəki digər 10 heyət üzvünün təxliyəsi davam edir.”
Araşdırma davam edir
Hadisənin səbəbi, sızıntının xarakteri və ətraf mühitə potensial təsirləri hazırda araşdırılır. Təhlükəsizlik qrupları tankerin zədələnmiş hissəsində ölçmələr aparır və əlavə risklərin qarşısı alınır.
Bu insident İstanbulda son günlər davam edən zəhərlənmə xəbərlərinin ardınca bölgədə əlavə narahatlıq yaradıb.
