Livan sərhədində və işğal olunmuş ərazilərdə hücumlar
Livanda İslam Müqaviməti 7 mart tarixində sionist rejim ordusuna qarşı həyata keçirilən hərbi əməliyyatlarla bağlı 33 rəsmi hərbi bəyanat yayıb. Məlumata görə, əməliyyatlar Livan–Fələstin sərhədi boyunca sionist rejim qüvvələrinin hərəkətlərinə qarşı həyata keçirilib, eyni zamanda işğal olunmuş Fələstin ərazilərinin şimalında və daha dərin bölgələrində yerləşən hərbi bazalar, mövqelər və qoşun toplanışları hədəfə alınıb.
Müqavimət qüvvələri bildirib ki, bu əməliyyatlar sionist rejim Livanın onlarla şəhər və qəsəbəsinə, o cümlədən Beyrutun cənub ətrafına endirdiyi hücumlara cavab olaraq həyata keçirilib. Rəsmi açıqlamada qeyd olunur ki, zərbələr əsasən hərbi obyektlərə və ordunun mövqelərinə yönəldilib.
Sərhəddə toqquşma və pilotsuz aparat hücumları
Məlumata görə, əməliyyatlar 6 mart axşam saatlarından başlayıb. Müqavimət qüvvələri sionist rejimə məxsus dörd helikopterin Suriya istiqamətindən Livan ərazisinə daxil olaraq piyada qüvvələri endirdiyini müşahidə edib. Bu qüvvələrin Bəqaa bölgəsində yerləşən Nəbi Şit qəsəbəsinə doğru hərəkət etdiyi bildirilib.
Müqavimət döyüşçüləri həmin qüvvələrlə yüngül və orta çaplı silahlarla qarşıdurmaya giriblər. Toqquşmadan sonra sionist rejim qüvvələrinin geri çəkilməsini təmin etmək üçün bölgəyə onlarla hava zərbəsi endirildiyi, eyni zamanda müqavimət qüvvələrinin də artilleriya atəşi ilə geri çəkilmə marşrutunu hədəfə aldığı qeyd olunub.
Sonrakı saatlarda müxtəlif mövqelərdə yerləşən işğalçı rejim hərbi qüvvələri raket və pilotsuz uçuş aparatları ilə hədəfə alınıb. Məlumatda bildirilir ki, sionist hərbçilərinin toplandığı məntəqələrə, o cümlədən Xiyam şəhəri ətrafındakı mövqelərə bir neçə dəfə zərbələr endirilib.
Hərbi bazalar və strateji obyektlər hədəf alınıb
Müqavimətin açıqlamasına görə, əməliyyatlar çərçivəsində sionist rejimin bir sıra hərbi bazaları və strateji obyektləri də hədəfə alınıb. Bunlar arasında Hayfa neft emalı zavodu, hərbi sənaye müəssisələri, həmçinin müxtəlif hava müdafiə və kəşfiyyat obyektləri yer alır.
Bildirilib ki, işğal altındakı ərazilərin şimalında yerləşən Nahariya və Kiryat Şmona kimi yaşayış məntəqələri istiqamətində də pilotsuz aparat və raket zərbələri endirilib. Bundan əlavə, Tel-Əviv yaxınlığında yerləşən bəzi hərbi bazaların da raket hücumlarına məruz qaldığı qeyd olunub.
Açıqlamada həmçinin sionist rejim ordusunun müxtəlif hərbi qərargahlarının, o cümlədən şimal komandanlığına aid obyektlərin də hədəfə alındığı bildirilib.
Müqavimət əməliyyatların məqsədini açıqladı
Livanda İslam Müqaviməti yayımladığı bəyanatda əməliyyatların Livan ərazisinin və xalqının müdafiəsi məqsədilə həyata keçirildiyini vurğulayıb. Bildirilib ki, hücumlar sionist rejim ordusunun Livana qarşı davam edən hərbi əməliyyatlarına cavab xarakteri daşıyır.
Açıqlamada qeyd olunur ki, müqavimət qüvvələri əsasən hərbi hədəfləri vurur və əməliyyatlar yalnız sionist rejim ordusunun mövqelərinə yönəlib. Bəyanatda İsrailin isə Livanda mülki yaşayış məntəqələrini hədəfə aldığı bildirilib
Müqavimət qüvvələri bundan sonra da Livana qarşı hücumlar davam etdiyi müddətdə əməliyyatların davam etdiriləcəyini bildirib.
