Lavrov İrana qarşı hücumların məqsədini açıqladı
Rusiya xarici işlər naziri Sergey Lavrov bildirib ki, ABŞ və İsrailin İrana qarşı həyata keçirdiyi hücumların əsas məqsədlərindən biri Tehranla ərəb ölkələri arasında münasibətlərin normallaşmasının qarşısını almaq olub.
Lavrov qeyd edib ki, Moskva daha əvvəl Hörmüz boğazındakı gərginliklə bağlı BRICS ölkələri adından birgə bəyanat qəbul edilməsini təklif etmişdi.
Lakin onun sözlərinə görə, İran və Birləşmiş Ərəb Əmirlikləri arasında fikir ayrılıqları ortaq mövqenin formalaşmasına mane olub.
“Fələstin dövləti olmadan Qərbi Asiyada sabitlik mümkün deyil”
Rusiya diplomatiyasının rəhbəri vurğulayıb ki, müstəqil Fələstin dövlətinin yaradılmaması Qərbi Asiyanı uzun illər radikalizm və ekstremizm üçün açıq məkan olaraq saxlayacaq.
Lavrov hesab edir ki, bölgədə davamlı sabitlik yalnız siyasi həll və regional balansın qorunması ilə mümkündür.
ABŞ-ın enerji planları ilə bağlı iddialar
Enerji məsələlərinə toxunan Lavrov bildirib ki, Vaşinqton Avropa şirkətlərinə məxsus olmuş “Nord Stream” layihəsinin hissələrini ucuz qiymətə almağa çalışır.
Onun sözlərinə görə, ABŞ bu addımla gələcəkdə qaz kəmərlərinin yenidən qurulmasına nəzarət etməyi planlaşdırır.
“Vaşinqton Venesuela-Rusiya əməkdaşlığına nəzarət etmək istəyir”
Lavrov əlavə edib ki, ABŞ Venesuelanın daha əvvəl Rusiyanın “Rosneft” şirkəti ilə qurduğu neft əməkdaşlığına da nəzarət etməyə çalışır.
Rusiya rəsmisi qlobal enerji bazarının yeni münaqişələrdən ciddi zərər görə biləcəyini də bildirib.
Babülməndəb boğazı ilə bağlı xəbərdarlıq
Lavrov qeyd edib ki, əgər Babülməndəb boğazında da hərbi qarşıdurma baş verərsə, dünya enerji sektoru böyük itkilərlə üzləşəcək.
O, Hörmüz və Babülməndəb kimi strateji keçid nöqtələrində təhlükəsizliyin pozulmasının qlobal iqtisadiyyata ciddi təsir göstərəcəyini vurğulayıb.
Putin də münaqişənin bitməsini istəmişdi
Bir neçə gün əvvəl Rusiya Prezidenti Vladimir Putin də İran və ABŞ arasında davam edən qarşıdurmanın “çətin və mürəkkəb münaqişə” olduğunu bildirmişdi.
Putin qeyd etmişdi ki, heç bir tərəf bu müharibənin davam etməsindən fayda götürmür və problemin ən qısa zamanda həll olunacağına ümid edir.
Rusiya lideri həmçinin Moskvanın 2005-ci ildə olduğu kimi İranın zənginləşdirilmiş uranının ölkədən çıxarılması modelini yenidən tətbiq etməyə hazır olduğunu vurğulamışdı.
