Laricani: İran mənafelərini qoruyan hər həlli qəbul etməyə hazırdır
Danışıqlar davam edir
İran Ali Milli Təhlükəsizlik Şurasının katibi əli Laricani bildirib ki, Tehranın danışıqlardan imtina etdiyi iddialar həqiqəti əks etdirmir. Onun sözlərinə görə, ölkəsi hətta hərbi təcavüz dövrlərində belə müzakirələrdən geri çəkilməyib.
Laricani vurğulayıb ki, İran ədalətli və məntiqli, milli mənafelərini qoruyan hər bir təklifi qəbul etməyə hazırdır. O, Avropa və Rusiya tərəfindən iki fərqli təklifin irəli sürüldüyünü və Tehranın hər iki təklifi bəzi şərhlərlə qəbul etdiyini açıqlayıb. Lakin qarşı tərəflərin öhdəliklərinə əməl etmədiyini və “tətik mexanizmi”ni işə salmağa davam etdiyini qeyd edib.
ABŞ təklifinə etiraz
İran rəsmisi ABŞ-ın irəli sürdüyü ilkin təklifin qəbuledilməz olduğunu bildirib. Həmin təklifdə İran raketlərinin uçuş məsafəsinin 500 kilometrdən azaldılması tələb olunurdu. Laricani bunu “heç bir ləyaqətli dövlətin qəbul edə bilməyəcəyi şərt” adlandırıb.
O, qarşı tərəfi nüvə sazişini pozmaqda ittiham edib və bu gün həmin sazişin mətnindən öz məqsədləri üçün istifadə etdiklərini bildirib.
İranın mövqeyi dəyişməz qalır
Laricani vurğulayıb ki, Tehran milli təhlükəsizliyindən və maraqlarından güzəştə getməyəcək. O, İranın raket proqramına dair mövqeyinin qəti olduğunu qeyd edərək, bu siyasətin İsrailin dağıdıcı yanaşmaları ilə ziddiyyət təşkil etdiyini söyləyib.
İran rəsmisi həmçinin qonşu ölkələrlə siyasi, iqtisadi və təhlükəsizlik sahələrində əməkdaşlığa açıq olduqlarını, bu istiqamətdə siyasəti davam etdirəcəklərini açıqlayıb.
“Tətik mexanizmi” mübahisəsi
Laricani İran Ticarət Palatasının üzvləri ilə görüşdə Fransanın mövqeyinə də toxunub. Onun sözlərinə görə, Paris Beynəlxalq Atom Enerjisi Agentliyi ilə anlaşma əldə olunacağı halda mexanizmin işə salınmasından imtina edəcəyinə söz versə də, bu öhdəliyə əməl etməyib.
O, əlavə edib ki, İran agentliklə son sazişi Misirdə imzalayıb. Bu addım nüvə obyektlərinə edilən hücumlardan sonra xüsusi əməkdaşlıq mexanizmi yaratmaq üçün atılıb.
