Laricani: “İranın nüvə gücünü məhv etdiklərini düşünmək ağlasığmaz fantaziyadır”
İran Ali Milli Təhlükəsizlik Şurasının katibi Əli Laricani Pakistana səfəri zamanı HUM News-a müsahibəsində ABŞ və İsrailin İranın nüvə imkanlarını sıradan çıxardıqları barədə iddialarını sərt şəkildə tənqid edib. O vurğulayıb ki, Vaşinqton və Tel-Əvivin bu açıqlamaları “uydurma, yetkinliksiz və açıq-aşkar cəfəngiyyatdır”.
Laricani bildirib ki, İranın nüvə sənayesi yerli bilik üzərində qurulub və bu bilik “bombalanacaq bir bina deyil, minlərlə İranlı alimin beynindədir”. Ona görə də ABŞ Prezidenti Donald Trampın “İranın nüvə proqramını məhv etdik” iddiası “reallıqla heç bir əlaqəsi olmayan siyasi şoudur”.
ABŞ–İsrail hücumu və hüquqi pozuntular
Laricani iyun ayında baş vermiş ABŞ–İsrail hücumunu xatırladaraq, İranın yüksək rütbəli komandirləri, nüvə alimləri və mülki şəxslərin şəhid olduğunu qeyd edib. O, üç nüvə obyektinin bombalanmasının BMT Nizamnaməsinə, beynəlxalq hüquqa və NPT-yə zidd olduğunu bildirib.
Tramp və ABŞ rəsmilərinin “İranın nüvə ambisiyalarını məhv etdikləri” barədə iddialarını Laricani “saxta qələbə bəyanatları” kimi dəyərləndirib.
“Bu bilik məhv edilə bilməz”
İran rəsmisi bildirib ki, İsrailin sui-qəsd və terror əməliyyatları da nəticə vermir, çünki İranın minlərlə nüvə mütəxəssisi var: “Bizim proqram beyinlərdədir, sənaye kimi yenidən dirçələn həyat qabiliyyətinə malikdir.”
Laricani deyib ki, İran nüvə silahı istehsal etmir, yalnız sülhməramlı nüvə enerjisi proqramını davam etdirir: “Düşmən 10 dəfə hücum etsə belə, biz qarşılığını verəcəyik.”
Diplomatiya və danışıqlar
Laricani qeyd edib ki, İran heç vaxt səmimi diplomatiyadan qaçmayıb, istər birbaşa, istər dolayı, istərsə də 5+1 formatında danışıqlara hazır olduğunu göstərib. Problem qarşı tərəfin nəticəni əvvəlcədən diktə etməyə çalışmasıdır: “Bu, danışıqlar deyil, adı danışıqlara bənzədilən bir farsdır.”
İran–Pakistan münasibətləri və regional mesajlar
Laricani İran–Pakistan münasibətlərini tarixi, səmimi və strateji adlandırıb. O bildirib ki, hər iki ölkə regionda mühüm rol oynaya biləcək güc mərkəzləridir və əlaqələrin genişləndirilməsi üçün heç bir məhdudiyyət yoxdur.
Laricani Pakistan–Əfqanıstan gərginliyinə də toxunaraq, hər iki xalqın uzunmüddətli müharibələrdən əziyyət çəkdiyini və İranın vasitəçi roluna hazır olduğunu bildirib.
İsrailin regionda siyasəti
Laricani İsrailin regionda son fəaliyyətlərini “rejimin avantürist mahiyyətinin açıq göstəricisi” adlandırıb. O bildirib ki, İsrail ABŞ-ın birbaşa dəstəyi ilə bölgədə hegemonluq yaratmağa çalışır və məqsəd “regionu ya tabe etmək, ya da dağıtmaqdır”.
İranın Fələstin mövqeyi
Laricani ABŞ-ın “Qəzza sülh sazişi” kimi təşəbbüslərini birtərəfli və qeyri-legitim adlandırıb və vurğulayıb ki, Fələstinin gələcəyinə yalnız demokratik səsvermə qərar verməlidir.
