Misirin təklifi İsraildə narahatlıq doğurdu
İsrail müxalifətinin lideri Yair Lapid Misirin ərəb ölkələrinin birgə hərbi qüvvə yaratmaq təşəbbüsünə münasibət bildirib. O, bu addımı İsrailin ərəb ölkələri ilə imzaladığı normallaşma sazişlərinə “ağır zərbə” adlandırıb. Lapid xüsusən İsrailin ənənəvi müttəfiqlərindən bəzilərinin Fələstin dövlətinin qurulmasına dəstək verməsini ciddi xəbərdarlıq siqnalı kimi qiymətləndirib.
Netanyahunun siyasətinə sərt hücum
Lapid “Makan” radiosuna verdiyi açıqlamada baş nazir Benyamin Netanyahunun siyasətini kəskin tənqid edib:
“Bu hökumət İsrailin beynəlxalq mövqeyini dağıdır. Məsuliyyətsizlik, səriştəsizlik və təkəbbürün zəhərli qarışığı bizi diplomatik təcridə aparır. Hökumət dəyişməsə, nəticələri ağır olacaq.”
Onun sözlərinə görə, hazırkı siyasət İsrailin regional və beynəlxalq münasibətlərində dərin çatlar yaradıb və ölkənin gələcəyini təhlükə altına qoyub.
BMT-dən İsrailə qarşı sərt qərar
Qeyd edək ki, ötən gün BMT Baş Assambleyası böyük səs çoxluğu ilə Fələstin dövlətinin qurulmasına dair konkret və geri dönməz addımların atılmasını tələb edən sənəd qəbul edib. Bəyanatda İsrailin Qəzzada mülki əhaliyə, infrastruktur obyektlərinə qarşı hücumları, blokada və aclıq siyasəti pislənib. Sənəddə açıq şəkildə vurğulanıb ki, “Qəzza müharibəsi dərhal dayandırılmalıdır.”
Bu qərar və Misirin yeni təşəbbüsü İsrailin regional siyasətində təcrid vəziyyətini daha da dərinləşdirib.
